PREVIA X24 XUVENIL DIVISIÓN DE HONRA FS | Redondela FS Rodavigo - Noia Portus Apostoli FS | O último antes do gran reto

Venres, 04/04/2025 · 12:20h · Imaxe: Manuel Lorenzo/Noia PA FS | Os de Daniel Ventoso irán a polo triunfo a Redondela (dom. 06/04, 18:30h), no encontro previo á Copa de España Xuvenil FS.

O Xuvenil DH do Noia Portus Apostoli FS disputa este domingo 6 ás 18:30h no Pavillón A Marisma de Redondela o seu partido da xornada 24, no que se enfrontará ao Redondela FS Rodavigo.

As dúas últimas vitorias (5-0 ao ED Vigo 2015 FS e 12-0 no aprazado da X16 ao Stellae Leis Pontevedra FS) confirman que o cadro noiés regresou a un bo estado de forma. Xusto a tempo para non ceder o liderado do que parte da vantaxe se lles deslizou (tan só 1 punto de renda sobre 5 Coruña FS) e de cara ao soño da Copa de España Xuvenil FS de Murcia, que por fin se fará realidade en apenas unha semana, co duelo de cuartos de final a disputarse o vindeiro venres 11.

Pero antes de centrarse na Copa, aos de Daniel Ventoso quédalles unha última tarefa ligueira, en forma de visita ao Redondela FS Rodavigo. Os redondelanos ocupan a 11ª posición con 27 puntos, desde a que, máis aló de poder progresar en postos, buscan pechar canto antes unha permanencia matemática que semella factible, con 9 unidades de vantaxe. Chegan a este duelo con derrotas nos 3 anteriores, sendo a máis recente o 4-3 fronte a Sibuscascoche Ribeira FS.

A meta en Redondela para os brancos é clara: lograr tres puntos que sirvan para solidificarse unha xornada máis no liderado e encher ata os topes a confianza para unha histórica Copa de España que vén en sete días.

---

Precedentes

·29 de outubro de 2023 | X7 Liga Galega Xuvenil FS 2023/2024 | RED 3-9 NPA

·9 de marzo de 2024 | J22 Liga Galega Xuvenil FS 2023/2024 | NPA 4-6 RED

·9 de novembro de 2024 | X9 Xuvenil División de Honra FS – Grupo I 2024/2025 | NPA 8-3 RED