Venres, 10/01/2025 · 11:30h · Imaxe: Manuel Lorenzo/Noia PA FS | Tras confirmarse a súa clasificación á Copa de España, o Xuvenil DH noiés inicia 2025 visitando Segovia este sábado 11 ás 18:30h co obxectivo de seguir consolidándose no liderado.
Que todo siga como no 2024 é o propósito do Xuvenil DH do Noia Portus Apostoli FS para este 2025, que arrancará para eles en competición co desprazamento á pista do CD San Cristóbal Cochinillo Tabladillo este sábado 11 ás 18:30h.
Histórica clasificación á Copa de España, primeiros de grupo con 36 puntos e 12 vitorias en 13 partidos. E todo isto, na temporada de regreso do equipo á categoría tras varios anos lonxe dela. Os de Daniel Ventoso colocaron o listón moi alto nunha primeira metade de curso á que lle quedan dúas xornadas para finalizar.
A penúltima leva aos brancos a enfrontarse co CD San Cristóbal Cochinillo Tabladillo, conxunto segoviano que ocupa a 8ª praza con 19 puntos. Nos seus dous últimos compromisos de 2024 lograron un 6/6 puntos que os aupou a unha zona tranquila da táboa, incluíndo un triunfo de prestixio na súa cancha ante un dos punteiros, o 5 Coruña FS, algo que tratarán de reeditar este sábado.
Ao Xuvenil DH preséntaselle un 2025 con retos aínda máis ambiciosos e desafiantes na competición, e está preparado para coller o toro polos cornos desde esta mesma fin de semana.
Precedentes
Será o primeiro enfrontamento histórico entre ambos equipos.
Comentários