O Filial comeza as preparacións para o seu segundo curso na Segunda División “B” FS

Xoves, 14/08/2025 · 16:40h · Imaxe: Manuel Lorenzo/Noia PA FS | Os de Chipi iniciaron este luns 11 a pretemporada, que se alargará ata o 5 de setembro con 4 amistosos fixados e dúas caras novas.

O Noia Portus Apostoli FS “B” 2025/2026 comezou a rodar este luns 11, coa reunión de presentación e a primeira sesión de adestramento dirixida por Chipi. Ábrese así unha pretemporada que durará ata o 5 de setembro e na que se disputarán 4 encontros amistosos.

Nesta toma de contacto inicial destacou a presenza das dúas incorporacións realizadas ata o momento. Son o pivote Álvaro Varela, procedente do Sport Sala FS, e o á Nico Cuello, que chega do Redondela FS. Xunto a eles, completaron o primeiro día once xogadores máis que xa pertencían ao Filial e/ou suben do Xuvenil de División de Honra tras finalizar etapa.

Nico Cuello (imaxe 3) e Álvaro Varela (imaxe 4), as novidades · Imaxes: Manuel Lorenzo/Noia PA FS

Trátase de Koke, Saúl, Hugo, Jaime Pan, Brais, Iago López, Teo, Mateo Varela e os en idade xuvenil Mosquera, Iago López, Álvaro e Oliver Chenel. A eles hai que sumarlles a Jorge, que se incorporará á dinámica nos vindeiros días, e a Iván e Koeman, quen están realizando a pretemporada co Primeiro Equipo. Con respecto ao término do curso pasado, non continúan Pablo, Lucho, Fer, Dani Prieto, Canario e Izan, este último en calidade de cedido no CD Burela FS.

Catro amistosos por diante neste período preparatorio

Os de Chipi mediranse en partidos amistosos durante esta pretemporada ao Exlabesa Leis Pontevedra, ao Troula Betanzos FS, ao A Baña Futsal e ao 5 Coruña FS, con horarios pendentes de confirmación.

Preparacións en marcha enfocadas única e exclusivamente en chegar na mellor forma de xogo e física á primeira xornada do Grupo 1 da Segunda División “B” FS a fin de semana do 13 de setembro, cando os nosos recibirán ao campión de grupo da anterior temporada, o Exlabesa Leis Pontevedra FS.