CRÓNICA X5 SEGUNDA DIVISIÓN “B” FS (NPA “B” 5–3 VTG) | Remontada de carácter

Sábado, 11/10/2025 · 13:12h · Imaxe: Manuel Lorenzo/Noia PA FS | O Filial sacou todo o seu tesón para dar a volta a un marcador adverso na segunda metade e durmir colíder coa súa cuarta vitoria consecutiva.

O Noia Portus Apostoli FS “B” sacou tres puntos de gran mérito na noite do venres. O equipo de Chipi tivo que repoñerse a numerosas adversidades, como un penalti en contra e unha expulsión, para remontar un resultado desfavorable ante o CD Tierno Galván FS e durmir colíder grazas ao seu cuarto triunfo seguido.

Dous equipos con sangue moza aseguraban ritmo, intensidade e, por momentos, descontrol. Romper a igualada era cuestión de tempo, e fíxoo Oliver Chenel para o Filial no 7’ nunha destacable acción de pivote. Teo puido aumentar vantaxes, pero o seu disparo foi ao pau e o CD Tierno Galván FS aproveitou para empatar e, posteriormente, darlle a volta ao marcador e colocarse cun 1-3.

Oliver Chenel adiantou aos brancos | Imaxe: Manuel Lorenzo/Noia PA FS

Os minutos pasaban e a temperatura no parqué ía en aumento. Como proba, o contador de faltas con ambos cadros en bonus con bastante antelación ao descanso. A situación pasou factura aos visitantes, que se enfrontaron a un tiro de dez metros na zurda de Álvaro. O canoneiro noiés errou no seu intento, pero non no dunha falta posterior, que significou un vital 2-3 antes do receso.

Espectacular reacción

Detrás no marcador, coa saída do partido de Brais por lesión e recibindo un penalti e unha expulsión en contra que definen unha irregular arbitraxe, o Filial puido baixar os brazos nos primeiros minutos do segundo acto. Non o ía permitir unha afección entregada como sempre nas gradas do Agustín Mourís, que insuflou ese imprescindible aire aos seus. Iván detivo o penalti, a defensa aguantou a inferioridade numérica tras a segunda amarela a Hugo e, xa chegado o 30’, un zurdazo milimétrico de Jaime Pan á rede terminou por prender a reacción local.

A partir de aí, o Noia Portus Apostoli FS “B” sentiuse máis cómodo que o seu rival, aínda que o partido podía caer de calquera lado. Tal é a igualdade desta categoría, na que os detalles deciden os puntos. E aí, coa sexta falta visitante que conlevou tamén a expulsión dun dos seus xogadores, o Filial non fallou. Esta vez si, Álvaro acertou desde a marca de dez metros e completou a remontada. O 5-3 da tranquilidad fíxoo Nico Cuello, aproveitando o xogo de cinco dos valisoletanos.

Merecíao un equipo cabezudo, que se empeñou en non deixar ir un partido que se lles puxo moi en contra e, a base de carácter, terminou festexando o seu cuarto triunfo consecutivo. Como premio, verse unha noite compartindo a primeira posición. Un soño que buscarán prolongar nas vindeiras xornadas.

Post partido de Chipi

Próximo partido

Os noieses visitarán ao IES Coruxo FS pola 6ª data ligueira o sábado 18 ás 17:00h no Municipal de Coruxo.

---

Ficha técnica

Noia Portus Apostoli FS “B”: Iván (p), Hugo (c), Koeman, Teo e Brais. Tamén xogaron Jaime Pan, Álvaro, Iago López, Cepeda, Nico Cuello e Oliver Chenel.

CD Tierno Galván FS: Edu Durante (p), Dani Caramazana, Mario Vaquero, Armand Torrego e Antonio Marcos. Tamén xogaron Adrián Rodríguez (p), Álvaro Vallejo, Álvaro Martínez, Javier Sanz (c), Jorge Sanz, David Bachiller e Andrés Marcos.

Goles: 1-0 Oliver Chenel (7’), 1-1 Antonio Marcos (8’), 1-2 Álvaro Vallejo (11’), 1-3 Armand Torrego (12’), 2-3 Álvaro (15’), 3-3 Jaime Pan (30’), 4-3 Álvaro (37’), 5-3 Nico Cuello (39’).

Os árbitros Iván Feliz Otero e Miguel Jesús Rodríguez Pontanilla amoestaron con tarxeta amarela nos noieses a Teo (8’), o adestrador Chipi (17’), Álvaro (24’), Hugo (25’ e 25’) e Nico Cuello (35’). Nos valisoletanos, ensinaron amarelas a Andrés Marcos (14’), Mario Vaquero (17’), o adestrador Sergio Toral (17’), Álvaro Vallejo (23’) e Antonio Marcos (35’ e 36’).

Incidencias: partido correspondente á xornada 5 do Grupo 1 da Segunda División “B” FS, disputado no Municipal Agustín Mourís ante uns 250 espectadores.