CRÓNICA X30 XUVENIL DIVISIÓN DE HONRA FS (NPA 5–1 RED) | BICAMPIÓNS DE LIGA!

Luns, 01/06/2026 · 15:32h · Imaxe: Manuel Lorenzo/Noia PA FS | Os de Pablo Cardoso volveron a erguer o título por segundo curso seguido, despois de superar con claridade ao seu rival na última xornada ligueira.

Por segunda temporada consecutiva, o Xuvenil DH do Noia Portus Apostoli FS conságrase campión do Grupo 1. Así o referendou co triunfo (5-1) o sábado ante o Redondela FS Rodavigo nun Agustín Mourís que celebrou un novo éxito dos seus rapaces.

Oito minutos tardou o equipo de Pablo Cardoso en abrir a lata dun encontro que dominaba, pero no que lle custaba xerar ante a férrea defensa redondelá. De feito, tivo que facelo cun auténtico golazo, un disparo afastado e axustado á escadra que sacou da manga André en acción de saque de banda. Non obstante, os azuis seguiron poñéndoo difícil. Máis, cando lograron o empate nunha eficaz transición ofensiva no minuto 13. Pero o Noia, que non deixou de intentalo en tarefas ofensivas, conseguiu chegar ao descanso con vantaxe, grazas ao tanto de Danito, que culminou unha gran xogada colectiva.

Consulta AQUÍ a GALERÍA de imaxes | Imaxe: Manuel Lorenzo/Noia PA FS

Estado de celebración declarado

Os blancos continuaron achantando o camiño con goles, xa na segunda metade. Oliver Chenel colocou, de cabeza, o terceiro a pase de Xavi Souto no 25’. Pasado o ecuador do reinicio, o capitán César aproveitou o servizo de Jorge Santiago ao segundo pau para o 4-1. Co Redondela FS Rodavigo utilizando porteiro-xogador, o propio César puxo a rúbrica desde a súa media pista.

Nin falta fixo mirar o resultado do perseguidor, un CD Inter Sala Adarsa Mercedes que acabou perdendo en Lugo, para terminar por declarar o estado de celebración no Municipal Agustín Mourís. O segundo título de Xuvenil División de Honra FS consecutivo e a cuarta campaña seguida na que o Xuvenil noiés se proclama campión ligueiro. Outra proeza máis dunha xeración de rapaces espectacular, á que aínda lle queda un último reto por encarar este curso.

Próximo partido

Realizado o sorteo, os noieses, como campións do Grupo 1, afrontan a fase previa do Campionato de España de Clubes Sub-19 esta vindeira semana na casa fronte ao subcampión del Grupo 7, ElPozo Murcia FS, o sábado 6 de xuño ás 19:00h.

---

Ficha técnica

Noia Portus Apostoli FS: Cristian (p), Cepeda, Koeman, Xavi Souto e Oliver Chenel. Tamén xogaron Mosquera (p), Jorge Santiago, Iván León, Danito, César (c), André, Bosco, Hugo Veiga e Miguel Romero.

Redondela FS Rodavigo: Breixo (p), Argibay, Adri, Pipi e Noé (c). Tamén xogaron Yeison (p), Vieira, Hugo e Pablo.

Goles: 1-0 André (8’), 1-1 Argibay (13’), 2-1 Danito (20’), 3-1 Oliver Chenel (25’), 4-1 César (31’), 5-1 César (35’).

Os árbitros Carlos Jesús González Pardal e Iago Cacheda Fernández amoestaron con tarxeta amarela ao redondelán Pipi (37’).

Incidencias: partido correspondente á xornada 30 do Grupo 1 da Xuvenil División de Honra FS, disputado no Municipal Agustín Mourís de Noia ante uns 300 espectadores.