CRÓNICA X1 XUVENIL DIVISIÓN DE HONRA FS (NPA 5–4 CRI) | Suada primeira vitoria

Domingo, 12/10/2025 · 18:33h · Imaxe: Manuel Lorenzo/Noia PA FS | Un tanto en propia meta a falta dun minuto rubrica o triunfo do equipo de Pablo Cardoso no debut ligueiro.

O Xuvenil de División de Honra do Noia Portus Apostoli FS empeza con bo pé o campionato ligueiro, despois de sumar os tres puntos nun disputado partido ante o CD San Cristóbal Cochinillo Tabladillo.

Duelo de toma e daca que se puxo costa arriba para os noieses moi cedo. Unha desafortunada acción provocou o 0-1 no primeiro minuto de xogo. A través de rápidas transicións, os visitantes puideron aumentar distancias, pero foi o equipo de Pablo Cardoso o que soubo ver portería para o empate, por medio de Iván León, e pouco despois adiantarse co gol de Jorge Santiago, previa gran xogada de Cepeda.

Primeiros bos pasos do equipo | Imaxe: Manuel Lorenzo/Noia PA FS

Porén, o tramo final do primeiro tempo devolveu a dominancia no marcador ao CD San Cristóbal Cochinillo Tabladillo, que empatou no 17’ co tanto de Marco e atopouse co 2-3 no 19’, obra de Miguel Romero en propia portería. Ademais, Cepeda marrou un dez metros.

Ao Mourís vaille o drama

A por todas saíu o Portus Apostoli no reinicio. Pouco a pouco, o seu dominio foi dando froitos en forma de goles. Volveu a igualar o electrónico Xavi Souto desde o punto de penalti no 27’, e no 30’ Iván León recolleu un excepcional pase de Bosco, zafouse do meta rival e colocou o 4-3. Os segovianos tampouco se daban por vencidos, e cun remate preciso de Matute fixeron o 4-4.

O desenlace presentábase de novo emocionante. Como o venres co Filial e o sábado co Primeiro Equipo. E, ao igual que neses dous precedentes da fin de semana, sorriulle aos locais. Un envío á área de Cepeda desviado polo opoñente Arribas cara a súa propia portería daba a falta dun minuto o merecido premio ao empuxe e insistencia dun Xuvenil noiés que, posteriormente, aguantou no xogo de cinco do CD San Cristóbal para asinar a primeira vitoria da temporada.

Outra mostra do 'factor Mourís' | Imaxe: Manuel Lorenzo/Noia PA FS

Próximo partido

O equipo noiés visitará o Municipal Lalo García do Valladolid Tierno Galván AGROCESA o sábado 18 ás 19:30h pola segunda data ligueira.

---

Ficha técnica

Noia Portus Apostoli FS: Cristian (p), Xavi Souto, Cepeda, André e Jorge Santiago. Tamén xogaron Gabi (p), Iván León, Danito, Bosco, Gabi, Hugo Veiga e Miguel Romero.

CD San Cristóbal Cochinillo Tabladillo: Adri (p), Matute, Serrano, Arribas e Luis Alonso. Tamén xogaron Aitor (p), Hugo (c), Galindo, Sergio, Portal, Dani G., Marco e Iker Gómez.

Goles: 0-1 Serrano (1’), 1-1 Iván León (3’), 2-1 Jorge Santiago (12’), 2-2 Marco (17’), 2-3 Miguel Romero, en propia portería (19’), 3-3 Xavi Souto, de penalti (27’), 4-3 Iván León (30’), 4-4 Matute (33’), 5-4 Arribas, en propia portería (39’).

Os árbitros Adrián Lagos Piedras e Miguel Jesús Rodríguez Pontanilla amoestaron con tarxeta amarela nos noieses a André (28’). Nos segovianos, amarelas a Galindo (16’) e Hugo (20’).

Incidencias: partido correspondente á xornada 1 do Grupo 1 da Liga Xuvenil División de Honra FS, disputado no Municipal Agustín Mourís de Noia ante uns 200 espectadores.