CRÓNICA SEMIFINAL COPA DE ESPAÑA XUVENIL FS (NPA 4–6 JCT) | Non puido ser
- 2 days ago
- 3 min read
O camiño do Xuvenil DH noiés na Copa de España Xuvenil FS finalizou na semifinal. Os de Pablo Cardoso chegaron a colocarse 3-1 en vantaxe, pero unha mala saída do descanso acabounos por condenar nun igualado duelo decidido por detalles.
Desde o inicio, moito ritmo, intensidade e reparto de alternativas tanto na pista por parte dos equipos como desde a grada na voz das afeccións. O primeiro gol produciuse no 7’, coa sinatura de Gabi para o Portus Apostoli, o máis listo na área nunha acción de saque de esquina. Os noieses atoparon petróleo coa pelota parada durante todo o partido, e así chegou tamén o 2-0. Balón enviado desde a liña lateral cara a posición de Oliver Chenel, que sacou unha manobra xa especialidade da casa co taco para ampliar diferenzas.
Os cartaxeneiros reduciron rápido cun disparo de falta de Ruano, aínda que a alegría duroulles pouco. O que tardou Gabi en fabricar un golazo, tamén en execución de libre directo, directo á escadra, culminando uns espectaculares minutos. As chegadas seguiron sucedéndose en ambas orixes da pista, con paus e oportunidades claras. A máis, un man a man de Álvaro que, en primeira instancia, os colexiados señalaran como falta tras deixar seguir o xogo, pero que anularon ao comprobar que era a sexta e tiro de dez metros para os noieses.
O reinicio, clave
A saída de vestiarios marcou o devir do partido. O Voladuras Carthago Jimbee Cartagena gañou en confianza e aproveitouse dos erros brancos para darlle a volta ao marcador, que no 26’ xa lucía un 3-4 favorable aos da trimilenaria, grazas ás dianas de David Valdés e Ruano por partida dobre.
O Portus Apostoli reaccionou, volvendo a crear perigo coas incorporacións do meta Cristian tras uns minutos de zozobra. Aínda que, novamente, a vía ao gol foi o balón parado. Letal Oliver Chenel no balcón da área para, no 30’, recibir desde a esquina e devolver a igualada.
Partido novo con 10 minutos por diante e o aroma de que un gol podía decantalo todo. Aí, o acerto tívoo Jimbee, co protagonista Ruano anotando o seu cuarto gol nun bo movemento na área. Intentouno o conxunto noiés de cinco ata o final, pero a puntería deulle as costas, e con segundos para o último bucinazo, David Valdés puxa a punta a porta baleira.
Tristeza na familia noiesa coa rúbrica da eliminación, mesturada cun incluso maior orgullo. Por competir con total honra na maior escena nacional da categoría, superando ademais a meta conseguida o ano pasado. E o de volver a ilusionar e facer historia co escudo do Noia Portus Apostoli FS, coa promesa de que isto segue sendo só o comezo.
Próximo partido
Volta á Liga, visitando esta fin de semana ao Trepalio León Sala pola 22ª xornada con data e hora por determinar.
Ficha técnica
Noia Portus Apostoli FS: Mosquera (p), Cepeda, Koeman, Gabi e Oliver Chenel. Tamén xogaron Cristian (p), Jorge Santiago, César (c), Álvaro e Iago López.
Voladuras Carthago Jimbee Cartagena: Fernando Alcalá (p) (c), Mariano, Felipe, David Valdés e Urraco. Tamén xogaron Chino, Ruano, Loren e Segura.
Goles: 1-0 Gabi (7’), 2-0 Oliver Chenel (12’), 2-1 Ruano (13’), 3-1 Gabi (13’), 3-2 David Valdés (22’), 3-3 Ruano (25’), 3-4 Ruano (26’), 4-4 Oliver Chenel (30’), 4-5 Ruano (34’), 4-6 David Valdés (40’).
Os árbitros Carlos Enrique Bustos Caparrós e Manuel Jesús Barrilero Mohedano, do comité andaluz, amoestaron con tarxeta amarela nos noieses a Gabi (7’), Álvaro (15’), Koeman (23’) e Iago López (33’). Nos cartaxeneiros, amarelas a Fernando Alcalá (13’) e David Valdés (37’).
Incidencias: partido correspondente á rolda de semifinais da Copa de España Xuvenil FS, disputado no Palacio Municipal de los Deportes de Granada ante uns 2000 espectadores, con ampla presenza de afeccionados noieses.
Comments