Consulta o calendario do Filial na Segunda División “B” FS 2025/2026

Sábado, 16/08/2025 · 16:40h | Debut o 13 ou 14 de setembro na casa ante o Exlabesa Leis Pontevedra FS.

A Real Federación Española de Fútbol desvelou os calendarios da Segunda División “B” FS. Así, o Noia Portus Apostoli FS “B” xa sabe cal será o seu camiño na súa segunda temporada seguida na categoría de bronce, que iniciará a fin de semana do 13 de setembro e finalizará o 2 de maio de 2026.

Os de Chipi, que comezaron o seu período de pretemporada este pasado luns 11, debutarán na casa ante o actual campión do Grupo 1, o Exlabesa Leis Pontevedra FS. O primeiro desprazamento producirase a seguinte semana, rumbo á pista do Piensos Durán Albense FS. Para rematar o campionato ligueiro, os noieses mediranse o 2 de maio ao ADC Lugo Sala, descendido desde a Segunda División FS, no Agustín Mourís.

Cinco novos equipos e un cambio de denominación

Os filialistas enfrontaranse durante a temporada a oito opoñentes galegos, seis de Castela e León e un de Asturias. Entre todos eles, cinco novidades con respecto ao curso pasado: o ADC Lugo Sala, que cae da Segunda División FS, e os ascendidos 5 Coruña FS, Concello de Begonte FS, CD Tierno Galván FS e o asturiano Deportivo Laviana FS. Ademais, é preciso resaltar a presenza do River Zamora FS, Club co que se fusionou o CD InterSala Zamora e que toma ese nome a partir desta campaña.