PREVIA X7 SEGUNDA DIVISIÓN “B” FS | Noia Portus Apostoli FS “B” – O Esteo FS | Partidazo para intentar volver a sumar de tres

Departamento prensa Noia PA FS
3 days ago
2 min read

Venres, 24/10/2025 · 18:20h · Imaxe: Manuel Lorenzo/Noia PA FS | Os de Chipi reciben a outro dos equipos da zona alta da táboa (sáb. 25/10, 19:45h. TV: GS360play) coa mente en deixar atrás a derrota da pasada xornada.

O Noia Portus Apostoli FS “B” recibe este sábado 25 a partir das 19:45h ao O Esteo FS, no que será un duelo entre cuarto e segundo da táboa, pola 7ª xornada ligueira.

A xeira de vitorias que acumulaban os filialistas chegou ao seu fin. Catro seguidas que significan 12 moi valiosos puntos para ver este inicio de campionato desde a zona alta. Máis concretamente tras 6 datas, na 4ª posición. A partir dela e co punto de tranquilidade que outorga, os de Chipi queren seguir medrando como equipo, e esta fin de semana enfróntanse a un bo exame na empresa.

A maxia de Adri ao servizo de O Esteo FS

Os de As Pontes de García Rodríguez tamén comezaron a temporada en gran forma. Catro vitorias, un empate e unha derrota para 13 puntos e segunda praza na clasificación. Moitos goles nos seus partidos, 11 deles a nome do máximo anotador da categoría, Jandro, e tamén moita maxia, esta a cargo de Adri. O internacional español estalle dando o salto de nivel ao O Esteo FS, que aspira a asentarse nesa persecución ao líder Exlabesa Leis Pontevedra FS.