Venres, 11/10/2024 · 18:30h · Imaxe: Manuel Lorenzo/Noia PA FS | Os noieses tratarán de estrear a nómina de triunfos no Mourís coa visita do cadro asturiano, este domingo 13 ás 12:30h.
Quinta xornada para o Noia Portus Apostoli FS “B”, que recibirá este domingo 13 ás 12:30h ao La Isla de Siero FS, outro ascendido á categoría, co obxectivo de lograr a primeira vitoria como locais.
Unha semana máis, os de Guille Murillo marcharon con sensacións encontradas do seu partido o pasado sábado. O empate na cancha de O Esteo FS soubo, de certa maneira, a pouco, tendo en conta que se avanzaron no marcador ata tres veces. Un caso que se une á igualada da primeira xornada fronte ao IES Coruxo FS e á derrota contra Stellae Leis Pontevedra FS, ambos choques disputados nun Mourís ao que queren quitarlle xa o seguro dos triunfos.
No outro lado da pista estará o La Isla de Siero FS. Os asturianos tamén se estrean na Segunda División “B” FS e están experimentando o seu particular proceso de adaptación á misma. Ata o momento, só sumaron 1 punto, produto do empate 5-5 a pasada xornada ante o Sibuscascoche Ribeira FS, pero como visitantes xa demostraron que poden poñerllo difícil a calquera, como fixeron ante ADAMO Xove FS.
Diante do seu público e contra un rival tamén novel, os noieses terán este domingo unha gran oportunidade para volver á senda do triunfo e facelo, por primeira vez, nun Agustín Mourís desexoso de ver esa ansiada vitoria na casa.
Precedentes
Será o primeiro duelo histórico entre ambos conxuntos.
Comments