O Filial noiés xogará o seu último partido antes de emprender a aventura da Segunda División “B” na pista do segundo clasificado, este sábado 11 ás 18:00h.
Último partido da temporada para o campión da Terceira División FS, un Noia Portus Apostoli FS “B” que visitará este sábado 11 de maio ás 18:00h a cancha do Distrito Ventorrillo FS, un equipo que, a 17 puntos, é o que máis de cerca o persegue.
Tres semanas se cumprirán este sábado do alirón noiés, e os de Daniel Ventoso veñen amosando a mesma seriedade desde aquela, incluso coa presenza de varios xogadores do Xuvenil nas vitorias en Guitiriz e contra o Cidade de Narón, algo que manterá esta xornada. Para esta data definitiva, os brancos tentarán volver a impoñerse contra o Distrito Ventorrillo FS, como xa fixeran no desenlace da primeira volta, e demostrar ata o final a súa condición de campión incontestable.
En camiño contrario van os coruñeses, que, tras o empate que propiciou que o Filial puidera confirmar o ascenso, perderon os seus compromisos fronte o Cidade de Narón (4-1) e 5 Coruña FS (4-3). De aí que a diferenza entre 1º e 2º pasara aos 17 puntos, e agora incluso ven esa praza en perigo, co Ribeira FS empuxando a 1 soa unidade de distancia e obrigando ao Ventorrillo FS a non tomarse ningunha relaxación antes do duro PlayOff.
O último adeus do Noia Portus Apostoli FS “B” á Terceira División FS, da que tentará despedirse, antes de afrontar a ambiciosa aventura da Segunda División “B”, cun definitivo do de peito que culmine a histórica campaña filialista.
Árbitros
Adrián García López e Carlos Jesús González Pardal.
Precedentes
·20 de novembro de 2022 | X10 Terceira División FS 2022/2023 | NPA “B” 2-8 VEN
·25 de marzo de 2023 | X25 Terceira División FS 2022/2023 | VEN 5-2 NPA “B”
·14 de xaneiro de 2024 | X15 Terceira División FS 2023/2024 | NPA “B” 6-5 VEN