O Filial atópase ante a posibilidade de ser campión esta fin de semana, obrigado a gañar nunha difícil visita a Outeiro de Rei e coa condición extra de que non o faga o segundo clasificado.
Os pasiños xa son cada vez máis curtos. O Noia Portus Apostoli FS “B” estará ante a posibilidade, por vez primeira, de ser campión de Terceira División FS este sábado 13 ás 20:00h no Municipal de Outeiro de Rei, algo que dependerá de lograr o triunfo ante un Outeiro de Rei SD en loita polo PlayOff e de que non gañe o Distrito Ventorrillo FS en Guitiriz.
Cando comece o duelo no municipio lucense, os brancos xa poderían saber se o resultado que condiciona as opcións é favorable ou non. Sexa como sexa, o foco noiés deberá estar ao 100% no que si pode controlar, que é o seu partido, especialmente ao tratarse dun enfrontamento contra un dos dous rivais que foi capaz de superalo na primeira volta.
O Outeiro de Rei SD converteuse o pasado novembro no primeiro conxunto en superar a un intratable Filial e abriu unha esperanza na loita por alcanzar o primeiro posto. Porén, o ritmo dos noieses seguiu practicamente inalterado, e un tramo de máis dun mes sen gañar relegou aos lucenses á batalla por obter un billete no PlayOff de ascenso. Actualmente ocupan a 4ª praza con 44 puntos, 2 de marxe sobre o corte. No seu último compromiso empataron a tres tantos en Narón.
Un camiño de máis de 7 meses, construído a base de alegrías e grandes momentos, nos que tamén tocou superar adversidades e posibles dúbidas, é o que leva ás costas un Filial que xa ve no horizonte ese soño improbable a principios de campaña. Son poucos pasiños, pero que haberá que dar coa convicción e a ambición de todos os anteriores para facelos realidade.
Árbitros
Adrián González Paulo e Sergio López Riveiros.
Precedentes
·30 de outubro de 2022 | X7 Terceira División FS 2022/2023 | OUT 3-7 NPA “B”
·4 de marzo de 2023 | X22 Terceira División FS 2022/2023 | NPA “B” 4-5 OUT
·26 de novembro de 2023 | X11 Terceira División FS 2023/2024 | NPA “B” 3-7 OUT
Comments