Venres, 10/01/2025 · 12:30h · Imaxe: Manuel Lorenzo/Noia PA FS | O Filial retoma a competición visitando Coruxo este sábado 11 ás 17:00h.
Pasadas as festas do Nadal, toca volver ao 40x20 para o Noia Portus Apostoli FS “B”, que intentará estar á altura da súa gran primeira volta nunha segunda que iniciará o sábado 11 ás 17:00h na pista do IES Coruxo FS.
Os de Guille Murillo concluíron 2024 cun gran triunfo na pista do naquel momento colíder Grupo FORMA-T Vilalba FS, que os colocou 6º con 26 puntos. O colofón a un espectacular tramo final de ano, no que sumaron 6 vitorias en 7 partidos. De cara a esta segunda volta, os filialistas pretenden manterse nesa zona media-alta da táboa, sen poñerse ningún teito.
Neste primeiro duelo da segunda volta, os noieses visitarán a un duro oso de roer, como xa comprobaron na primeira xornada. 3-3 finalizou aquel envite, no que o IES Coruxo FS foi quen de igualar unha desvantaxe de dous goles. Sempre intensos e competitivos, os vermellos son 12º con 17 unidades, e precisan sumar máis no seu casilleiro para estar lonxe da zona perigosa da clasificación o antes posible.
Volta á acción para o Filial con toda a ilusión e a ambición de, polo menos, seguir os pasos dunha metade inicial de curso a aplaudir e seguir medrando tanto a nivel individual como colectivo nunha categoría moi esixente.
Precedentes
·14 de setembro de 2024 | X1 Segunda División “B” FS – Grupo I 2024/2025 | NPA “B” 3-3 COR
Comentarios