Último partido do ano no Agustín Mourís para o Filial, que tras encaixar as dúas primeiras derrotas de maneira consecutiva, pretende recuperar o bo feeling con tres importantes puntos que se poñen en xogo este domingo ás 17:30h.
Por última vez neste 2023, o Noia Portus Apostoli FS “B” xogará diante da súa afección, coa visita do O Korreo Guitiriz FS este domingo 10 ás 17:30h e un claro obxectivo: deixar atrás as dúas derrotas contra Outeiro de Rei e Ribeira FS e volver a probar o sabor da vitoria que ben coñece das anteriores dez xornadas.
Ao contrario que contra o Outeiro, en Lugo os noieses non amosaron a súa mellor versión, e aínda así estiveron preto de sumar un ou incluso tres puntos. Recuperar ambos factores é a prioridade dos de David Palmas, tendo en conta ademais que a zona alta comeza a comprimirse, e podería facelo máis cun terceiro tropezo consecutivo.
Con 11 puntos e situado 12º, O Korreo Guitiriz FS pode semellar un rival propicio na misión branca, pero os seus últimos resultados invitan a non pensar niso. Empates contra Cidade de Narón e Ribeira FS, xunto cunha derrota pola mínima na pista do Distrito Ventorrillo FS, demostran que os guitiricenses son un cadro capaz de dar a sorpresa en calquera partido. Ademais, os precedentes deixan claro ser un rival incómodo para os nosos, con tres empates nos tres últimos enfrontamentos.
O ano está a punto de rematar, e o vestiario do Portus Apostoli “B” quere que neste par de partidos que lle faltan o faga á altura do conseguido ata a xornada 10, esquecendo as dúas últimas e achandando o camiño para os retos que se veñen en 2024.
Árbitros
Adrián Buján Barciela e Alejandro Godar Calvar.
Precedentes
·23 de febreiro de 2019 | X20 Preferente Autonómica – Grupo Norte 2018/2019 | NPA “B” 4-0 GUI
·29 de setembro de 2019 | X3 Preferente Autonómica – Grupo Norte 2019/2020 | NPA “B” 9-3 GUI
·1 de febreiro de 2020 | X18 Preferente Autonómica – Grupo Norte 2019/2020 | GUI 3-3 NPA “B”
·26 de novembro de 2022 | X11 Terceira División FS 2022/2023 | GUI 4-4 NPA “B”
·1 de abril de 2023 | X26 Terceira División FS 2022/2023 | NPA “B” 4-4 GUI
Comentarios