PREVIA AMISTOSO DE PRETEMPORADA | Noia Portus Apostoli FS – SC Braga | Penúltima proba

2 hours ago
2 min read

**Xoves, 27/08/2026 · 16:31h · Imaxe: Foto Pichero | Os noieses sumérxense na fase final da posta a punto (vie. 28/08, 20:30h) cun novo test, esta vez en Sanxenxo.**

O Noia Portus Apostoli FS disputa este venres 28 ás 20:30h no Municipal de Baltar (Sanxenxo) un novo amistoso de pretemporada. Será o penúltimo, a dúas semanas de iniciar a Liga Prime Futsal 2026/2027, e verase as caras cun rival de altura como é o SC Braga.

Última fase das preparacións para os brancos, que ata o momento disputaron tres amistosos. Os dous últimos, a pasada fin de semana no IX Trofeo Portus Apostoli, unha cita da que non acabaron con boas sensacións tras a ampla derrota na final contra Illes Balears Palma Futsal.

**A competición, cada vez máis preto | Imaxe: Manuel Lorenzo/Noia PA FS**

Nesas, os de David Palmas tratarán de aproveitar a oportunidade para recobrar o feeling positivo, ademais de continuar subindo o ritmo e a esixencia ante o cada vez máis próximo debut ligueiro.

O SC Braga, proba de toque anual

Desde 2019 ata hoxe, só houbo unha pretemporada na que noieses e bracarenses non se citaran. Este será o noveno enfrontamento, o que dá máis argumentos a constituír este duelo como un xa tradicional do verán. E é que o Portus Apostoli atópase no SC Braga a un opoñente de moito nivel, ademais de competitividade. Non en balde, trátase dun dos conxuntos punteiros de Portugal, que acumula dous trofeos recentes entre a tiranía de Benfica e Sporting CP. Nesta pretemporada, o SC Braga xogou ante O Parrulo Ferrol FS, ao que superou en A Malata por un 1-5, e ao ADC Nogueiró e Tenões. No plantel do cadro de Joel Rocha figuran xogadores destacados como Claudino, Daniel Airoso, Tiago Brito, Willian Carioca ou Tiago Sousa, entre outros.