PREVIA AMISTOSO PRETEMPORADA | Noia Portus Apostoli FS – O Parrulo Ferrol FS | O adianto dos derbis ligueiros, en Bertamiráns

Departamento prensa Noia PA FS
Aug 15
2 min read

**Venres, 15/08/2025 · 13:19h · Imaxe: Manuel Lorenzo/Noia PA FS | Noieses e ferroláns vense as caras (sáb. 16/08, 20:00h) no segundo amigable do cadro de David Palmas.**

Segunda proba para o Noia Portus Apostoli FS. Apenas catro días despois dunha primeira satisfactoria, os de David Palmas suben o nivel cunha cita ante o outro representante galego da Primeira División FS 2025/2026, O Parrulo Ferrol, este sábado 16 ás 20:00h no Municipal de Bertamiráns.

O envite do pasado martes en Bueu ante o ADCR Caxinas permitiu comprobar cales son eses primeiros aspectos que o Portus Apostoli domina e onde debe incidir o corpo técnico para seguir progresando como equipo. En liñas xerais, as sensacións de todos foron positivas, alimentando a ilusión e as ganas no grupo.

Enfrontarse a un dos opoñentes que esperan na Liga, ademais co aliciente de ser o rival da comunidade autónoma, esperta aínda un punto máis de expectación, dando por suposto que o foco continúa só e unicamente en tratar de lograr avances. Para o duelo, David Palmas terá as mesmas dúas baixas de Altamirano e Thierry, que segue en Brasil resolvendo asuntos burocráticos.

Ante un O Parrulo que regresa á elite

Cinco temporadas despois, O Parrulo Ferrol FS volverá a disputar a Primeira División FS. Os dirixidos por Gerard Casas lograron no PlayOff un ascenso que, a priori, non entraba nos seus plans hai un ano. De cara á volta, os ferroláns reforzáronse coas incorporacións de Xavi Cols, Jon, os brasileiros Jhoy e Penezio e o croata Niko Vukmir. Chegarán a Bertamiráns con dous amistosos disputados en Portugal, un triunfo por 3-4 contra Ferreira do Zêzere e unha derrota 2-1 ante Rio Ave.