PREVIA AMISTOSO PRETEMPORADA | Noia Portus Apostoli FS – ADCR Caxinas | Primeiro test!

Departamento prensa Noia PA FS
Aug 11
2 min read

Updated: Aug 13

**Luns, 11/08/2025 · 20:45h · Imaxe: Foto Pichero | Tras algo máis de dúas semanas de adestramentos, os de David Palmas disputan en Bueu (mar. 12/08, 20:30h) a súa primeira proba amistosa.**

O Noia Portus Apostoli FS afronta este martes 12 ás 20:30h o seu primeiro partido amistoso de pretemporada. Farao ante o conxunto portugués do ADCR Caxinas en terreo neutral, o Municipal Pablo Herbello de Bueu.

Os brancos realizaron ata o momento 21 sesións, centradas tanto no aspecto técnico-táctico como no físico. Un traballo de adecuación ao sistema, creación de sinerxias e posta a punto que terán o seu exame neste test inicial. David Palmas poderá contar para o mesmo con todo o plantel á súa disposición, incluídos o porteiro Iván e o á en idade xuvenil Koeman, a excepción de Thierry, que viaxou a Brasil para resolver asuntos burocráticos.

É só un amistoso, pero tamén é o regreso. A cuarta temporada seguida en Primeira División FS está a menos dun mes de comezar e as ganas por ver como progresa o conxunto noiés cara a ese debut en Manzanares son un clamor en toda unha Vila que cada día respira máis fútbol sala.

O ADCR Caxinas, un rival coñecido nas preparacións

Os noieses enfrentaranse por cuarta vez na historia ao cadro caxineiro, primeira en chan galego. Nos anteriores tres, pleno de vitorias para o Portus Apostoli, dato que non ensombrece o duro opoñente que resulta sempre o ACDR Caxinas, poderoso no aspecto físico e cheo de talento mozo con ganas de demostrar. A pasada campaña remataron na 9ª plaza na Liga Placard e chegaron a semifinais na Taça da Liga.