Venres, 13/09/2024 · 17:20h · Imaxe: Manuel Lorenzo/Noia PA FS | Os noieses continúan a súa preparación este sábado 14 ás 18:00 hora local no Pavilhão Centro Comunitário de Caxinas.
Seguen as probas para o Portus Apostoli 2024/2025, xa a menos dun mes de iniciar o campionato ligueiro e superando a metade do período de pretemporada. Neste caso, os noieses visitarán ao ADCR Caxinas Poça Barca, conxunto xa coñecido da Liga Placard portuguesa.
Ata agora, dous partidos e mesmas vitorias para os brancos, aspecto que sempre suma, a pesar de atoparse nunha época na que o primordial é adoptar mecanismos e consolidar un estilo de xogo recoñecible para equipo e afeccionado. Seguir facendo ben o que saiu de maneira positiva en Ferrol e Bertamiráns, así como modificar as cousas nas que aínda hai marxe de mellora será a meta do Portus Apostoli na súa terceira visita ao ADCR Caxinas Poça Barca.
Os da pequena zona pesqueira da costa noroeste portuguesa veñen de subir as súas prestacións na Liga Placard, finalizando 7º no torneo regular, un posto mellor que o curso anterior, caendo en cuartos do PlayOff ante o outro rival luso que terán os noieses esta pretemporada, o SC Braga. Coñecido no seu país por ser unha fonte de calidade e talento mozo, o ADCR Caxinas asegura un opoñente intenso e competitivo, xusto o que se busca nestes tramos previos á competición. Nos seus dous últimos enfrontamentos, o Noia levou o triunfo (0-2 e 1-4).
Como en todas as viaxes ao país veciño, coidado co horario. Ás 18:00 hora local e 19:00 hora española comezará o encontro, que mudará de escenario con respecto aos dous precedentes. Este disputarase no novo Pavilhão Centro Comunitário de Caxinas, lugar onde os noieses pretenderán seguir dando pasos adiante no seu crecemento.
O desprazamento
Ás 14:45h arrancará o autobús do Portus Apostoli dirección Caxinas. Tras o duelo, regreso a Noia.
Venda de entradas
Entrada gratuíta.
Emisión en directo
O partido non será emitido en directo por ningunha plataforma.
Precedentes
·22 de agosto de 2023 | Partido amistoso | CAX 0-2 NPA
·31 de xaneiro de 2024 | Partido amistoso | CAX 1-4 NPA
Коментарі