Mércores, 18/09/2024 · 13:00h · Imaxe: Manuel Lorenzo/Noia PA FS | Os dous equipos galegos de Primeira División FS volven a enfrontarse este xoves 19 ás 19:30h, esta vez no Municipal Vista Alegre de Burela.
Noia Portus Apostoli FS e Pescados Rubén Burela FS, parte 2... de pretemporada. Os dous conxuntos da comunidade que competirán en Primera na temporada 2024/2025 reatópanse menos de dúas semanas despois, este xoves 19 ás 19:30h co feudo do equipo laranxa como escenario.
Cuarto partido amistoso da pretemporada noiesa, que xa atravesa a súa quinta semana un momento idóneo para tratar de confirmar os pasos certeiros realizados ata o momento. E é que se é certo que tras a súa visita a Caxinas os brancos seguen contando compromisos amistosos por vitorias, non menos é que en Portugal completaron a mellor actuación en aspecto global ata a data, levando a batuta en boa parte dos 40 minutos.
Aínda está fresco o anterior cara a cara, que se resolveu con 3-1 favorable ao Portus Apostoli o pasado 7 de setembro en Bertamiráns. Co deste xoves disputándose en terreo burelés, o choque terá algo máis de semellanza aos que virán no campionato doméstico. Un punto máis de dificultade para un cadro noiés ao que lle agardan nas dúas últimas semanas de pretemporada rivais da nobleza europea e portuguesa.
Xa empezou o Mundial, o tempo de espera para a Liga xa é de menos dun mes, e o acelerador segue baixando pouco a pouco. Iso si, poñendo o máximo mimo en calibrar todo da maneira adecuada nestas voltas de formación, previas a colocarse diante das curvas que toca maniobrar ata maio.
O desprazamento
A expedición noiesa poñerá rumbo a Vista Alegre ás 15:15h. Tras o duelo, regreso a Noia.
Venda de entradas
Entrada gratis para socios/as do Pescados Rubén Burela FS e menores de idade, 5€ para maiores de idade non socios/as, tal e como especificou o Club laranxa.
Emisión en directo
O partido non será emitido en directo por ningunha plataforma.
Precedentes (últimos 5 partidos de competición oficial)
·8 de decembro de 2018 | X13 Segunda División FS 2018/2019 | NPA 2-9 BUR
·13 de abril de 2019 | X28 Segunda División FS 2018/2019 | BUR 3-3 NPA
·9 de xaneiro de 2021 | XXIX Copa Galicia – Final | BUR 5-2 NPA
·13 de abril de 2022 | XXX Copa Galicia – Ida de semifinais | NPA 5-3 BUR
·3 de maio de 2022 | XXX Copa Galicia – Volta de semifinais | BUR 3-1 NPA (penaltis, 1-3)
Comments