Presentado un VIII Trofeo Portus Apostoli que repite altísimo nivel

Mércores, 27/08/2025 · 17:15h · Imaxe: Manuel Lorenzo/Noia PA FS | Os noieses disputaranse o seu trofeo de verán ante o tricampión de Europa e bicampión do Mundo, o Illes Balears Palma Futsal, este venres 29 ás 20:00h.

A pretemporada termina para o Noia Portus Apostoli FS este venres 29, cando se enfrontará ás 20:00h ao tricampión europeo e bicampión mundial Illes Balears Palma Futsal, nun VIII Trofeo Portus Apostoli que foi presentado na mañá deste mércores no edificio do Casino de Noia.

Ao acto asistiron Javier Barreiro, director xeral do Noia Portus Apostoli FS; Jose Tirado, xerente do Illes Balears Palma Futsal; e por parte do Concello de Noia o seu alcalde, Francisco Pérez; a concelleira de Deportes, Sandra González; e o técnico de Deportes, Andrés Tuñas.

Imaxes: Manuel Lorenzo/Noia PA FS

O alcalde recoñeceu o ser “un orgullo estar aquí, ao voso carón, non só representando a esta institución, senon polo compromiso que ten este Concello co Noia Portus Apostoli FS e a labor que fai”. Pérez tamén deu as grazas tanto ao Illes Balears Palma Futsal pola súa asistencia á competición como ao Club noiés por ser unha figura que provoque que Noia “sexa coñecida a nivel nacional e internacional, o traballo que están facendo é realmente fantástico”.

A continuación, Javier Barreiro tomou a palabra para, en primeira instancia, dar a “benvida á nova corporación municipal de goberno, é o primeiro acto con eles e desde aquí tendémoslle a man para traballar xuntos no fútbol sala e en todo o deporte noiés”. O director xeral do Portus Apostoli destacou a importancia de contar de maneira habitual cun Club modelo a nivel mundial como é o Illes Balears Palma Futsal e convidou a todo o que queira a asistir a esta oitava edición dun dos trofeos “referente no verán” e a “gozar dun partido de altísimo nivel”.

Por último, interviu Jose Tirado, quen se amosou encantado de regresar a Noia, destacando que a Entidade branca estase convertendo “pouco a pouco nunha referencia internacional, porque a xente non comprende que unha Vila tan pequena poida competir entre os mellores do Mundo” e deu a súa noraboa a Concello e Noia Portus Apostoli FS por “acoller un torneo deste nivel, por parte de Illes Balears Palma Futsal vai a ter unha repercusión mundial e oxalá sexa unha fiesta para os afeccionados”.

Venda de entradas activa

As entradas para o encontro xa están á venta, tanto de maneira online en noiafs.compralaentrada.com/eventos como no Local Social do Club (rúa Carcasía, 7. Noia), aberto ata o venres en horario de 12:00h a 13:00h.