Horarios das xornadas 8, 9 e 10 do Torneo Apertura da Liga Prime Futsal
A RFEF deu a coñecer os horarios para as xornadas 8, 9 e 10 do Torneo Apertura da Liga Prime Futsal. Así, o Noia Portus Apostoli FS completa a súa folla de ruta do mes de novembro cun partido na casa e dous fóra, un deles con emisión por Teledeporte.
A xornada 8 do calendario ligueiro chegará para os noieses antes do fixado. Debido á disputa da Copa Intercontinental por parte do Illes Balears Palma Futsal, o enfrontamento entre ambos no Agustín Mourís xogarase o sábado 7 ás 18:30h, con sete días de antelación sobre o previsto. A continuación, os de David Palmas visitarán na 9ª xornada ao Viña Albali Valdepeñas o sábado 21 ás 13:00h, partido que contará coas cámaras de Teledeporte. Para pechar o mes, os brancos saltarán a pista en domingo por sexta vez en dez xornadas. Farano o día 29 ás 13:00h na cancha do Inter JP Financial FS.
O Club anunciará no seu momento o lanzamento da venda de entradas tanto no Local Social (rúa Carcasía, 7. Noia) como na plataforma online noiafs.compralaentrada.com/eventos para o encontro que se disputará en Noia.
Todos os partidos do Noia Portus Apostoli FS na Liga Prime Futsal poderanse ver a través de DAZN, tanto na modalidade de subscripción ‘Premium’ como na ‘Fútbol’.
Comments