Altamirano e Juampi Cuello con Arxentina e Mykytiuk con Ucraína esta semana
Os arxentinos Altamirano e Juampi Cuello e o ucraíno Mykytiuk foron convocados polas súas respectivas seleccións para disputar encontros de distinta índole nesta semana de fiestra para os combinados nacionais.
No caso dos dous primeiros, xogarán en Niterói (Brasil) a Futsal Finalissima, torneo organizado por CONMEBOL e UEFA no que a albiceleste participa como subcampioa de América xunto á campioa Brasil, ademais da campioa europea España e a subcampioa Portugal. A competición empezará para os nosos xogadores o sábado 7 ás 01:30h (hora peninsular española), co duelo de semifinais fronte aos brasileiros. Dependendo do resultado, disputarán o domingo a final ou o partido polo terceiro e cuarto posto.
Pola súa parte, Mykytiuk disputará con Ucraína o segundo partido do grupo 9 da ‘Main Round’ clasificatoria á Copa Mundial 2028. Farao contra Eslovaquia o martes 10 ás 18:00h no Gopass Arena de Bratislava.
Comments