CRÓNICA X4 SEGUNDA DIVISIÓN “B” FS (BEG 4-8 NPA “B”) | Medrando e gañando

Domingo, 05/10/2025 · 12:53h | O Filial segue dando pasos cara adiante ademais de sumar vitorias, a terceira consecutiva en catro xornadas, e aúpase ata a terceira praza da clasificación.

O Noia Portus Apostoli FS “B” continúa acumulando triunfos e, sobre todo, progresando como equipo. Así o fixo en Begonte, onde dominou o encontro desde o inicio para levar os tres puntos cun 4-8, facerse co terceiro triunfo consecutivo e terminar a cuarta xornada na terceira posición da táboa.

Saiu decidido o Filial ao parqué, e aos oito minutos xa mandaba no marcador por 0-3. Os tantos foron de Brais, Teo e Oliver Chenel, todos eles en diferentes rexistros: incorporación do porteiro, acción individual e unha precisa xogada colectiva, respectivamente. Xa no 17’, Koeman puxo o 0-4 a servizo de Hugo.

Pero os locais non se rendían, e antes do descanso conseguiron dous goles que reanimaron as súas esperanzas e as da súa afección de cara aos últimos vinte minutos de partido.

Idas e voltas no electrónico

Á saída de vestiarios, réplica do inicio do choque. O cadro dirixido por Chipi volveu a poñer terra de por medio. OUtro gol de Koeman, en acción de estratexia, e un esforzo persoal de Iago Lóoez por banda aplacaron a revolta do Concello de Begonte FS, polo menos por uns minutos.

E é que, como no primeiro acto, o conxunto chairego logrou recurtar a distancia a dous e reavivar o duelo. Aínda que a alegría local foi efímera, xa que Brais terminou de amarrar os tres puntos con dous goles máis que completaban o seu hat-trick particular e o 4-8 definitivo no luminoso, que confirma o gran momento dun Filial que, aínda que con moitas cousas por mellorar, segue medrando e gañando.

Declaracións post partido de Chipi

Próximo partido

Os brancos recibirán ao CD Tierno Galván FS o vindeiro venres 10 de outubro ás 21:30h no Agustín Mourís, pola quinta xornada ligueira.

---

Ficha técnica

Concello de Begonte FS: Sergio Freire (p), Daniel Pardo, Ángel Prado, Dani Jove (c) e Brais Astray. Tamén xogaron Sergio Gayoso, Jose Roca, Dani Varela, Anxo Veiga, Diego Rey, Pablo Vázquez e Martín Álvarez.

Noia Portus Apostoli FS “B”: Iván (p), Hugo (c), Koeman, Teo y Brais. Tamén xogaron Mosquera (p), Álvaro Varela, Mateo Varela, Jaime Pan, Álvaro, Iago López, Cepeda, Nico Cuello e Oliver Chenel.

Goles: 0-1 Brais (2’), 0-2 Teo (5’), 0-3 Oliver Chenel (8’), 0-4 Koeman (17’), 1-4 Ángel Prado (18’), 2-4 Anxo Veiga (20’), 2-5 Koeman (22’), 2-6 Iago López (28’), 3-6 Dani Jove (29’), 4-6 Dani Varela (32’), 4-7 Brais (33’), 4-8 Brais (36’).

Os árbitros Borja Darriba Villamor e Manuel Castro Fernández amoestaron con tarxeta amarela nos chairegos a Martín Álvarez (14’) e Dani Varela (15’). Nos noieses, amarelas a Álvaro Varela (15’) e Iago López (16’).

Incidencias: partido correspondente á xornada 4 do Grupo 1 da Segunda División “B” FS, disputado no Municipal de Baamonde.