CRÓNICA X3 SEGUNDA DIVISIÓN “B” FS (NPA “B” 4-1 RIV) | Traballada segunda vitoria consecutiva!

Luns, 29/09/2025 · 11:40h · Imaxe: Manuel Lorenzo/Noia PA FS | Os de Chipi impuxéronse no tramo final dunha igualada contenda para sumar de tres por segunda semana seguida.

O Noia Portus Apostoli FS “B” logrou no mediodía do domingo un novo triunfo, o segundo consecutivo, ao superar ao River Zamora FS por 4-1 nun partido máis competido do que di o marcador e que se decidiu no tramo final.

Noieses e zamoranos disputaron unha primeira metade de moito ritmo, pero tamén de equilibrio e pechada en canto a ocasións claras. Tanto, que todo semellaba indicar que o electrónico luciría un 0-0 no camiño a vestiarios. Porén, o capitán visitante Magi conseguiu romper as hostilidades no 19’ nunha acción característica de pivote.

Máis acción e remontada

O encontro cambiou na segunda metade. Os ataques estaban máis inspirados que as defensas, chegando por momentos a verse un intercambio de ofensivas de portería a portería. Nesas, Álvaro puxo a igualada preto do minuto 30, definindo á rede unha gran xogada individual de Koeman. Dos exemplos de talento aínda en idade xuvenil, ao igual que un Cepeda que fixo o seu debut neste envite e foi a gran novidade da convocatoria noiesa xunto a Gabi, tamén xuvenil.

Espadas por todo o alto para o treito decisivo e reparto de chegadas cos dous equipos coa vitoria entre cella e cella. Tivo as súas o River Zamora FS, pero con máis afán se amosou o Filial branco, inclinando a pista sobre todo a través das incorporacións do meta Iván.

Tentouno tanto o cadro de Chipi que, ao final, atopouno. E, ao igual que sete días antes en Alba de Tormes, o autor do gol diferencial foi Oliver Chenel, de novo presente no segundo pau para embocar o servizo amigo, esta vez de Iago López, a dous minutos do desenlace.

Sacaron o porteiro-xogador os zamoranos, pero só trouxo boas novas para os locais. Iván convertiu o terceiro desde a súa portería e Brais aproveitou un erro para facer a pracer o cuarto e definitivo tanto do choque. A guinda a unha completa actuación do Filial, que termina a terceira xornada 6º con 6 puntos de 9 posibles.

Próximo partido

O conxunto filialista visitará ao Concello de Begonte FS o vindeiro sábado 4 ás 19:30h pola cuarta xornada ligueira.

---

Ficha técnica

Noia Portus Apostoli FS “B”: Iván (p), Hugo (c), Koeman, Teo e Oliver Chenel. Tamén xogaron Álvaro, Brais, Iago López, Cepeda e Nico Cuello.

River Zamora FS: Barranquero (p), Samu, Saúl, Nico Rolón e Raulín. Tamén xogaron Iván, Magi, Perucho, Guille, Egido e Iván Muñoz.

Goles: 0-1 Magi (19’), 1-1 Álvaro (29’), 2-1 Oliver Chenel (38’), 3-1 Iván (39’), 4-1 Brais (40’).

Os árbitros Andrés Pinilla Boullosa e Daniel Dacal Deza amoestaron polos noieses con tarxeta amarela a Brais (26’) e Álvaro (31’). Nos zamoranos, amarela a Raulín (19’).

Incidencias: partido correspondiente a la jornada 3 del Grupo 1 de la Segunda División “B” FS, disputado en el Municipal Agustín Mourís de Noia ante unos 200 espectadores.