CRÓNICA X1 SEGUNDA DIVISIÓN “B” FS (NPA “B” 1-8 LEI) | Derrota na estrea

Sábado, 13/09/2025 · 22:18h · Imaxe: Manuel Lorenzo/Noia PA FS | Os de Chipi caen de maneira dura e excesiva no seu debut ante o vixente campión.

O Noia Portus Apostoli FS “B” empezou o campionato ligueiro 2025/2026 cunha ampla e esaxerada derrota a mans do Exlabesa Leis Pontevedra FS.

Os visitantes abriron o marcador no minuto 3 por medio de Said. A pesar da desvantaxe, os filialistas mantiveron o tipo e só dous erros brancos próximos á súa portería permitiron que o defensor do título abrira a diferenza de 0-3 ao descanso.

Sen dar o brazo a torcer

E é que o Exlabesa Leis Pontevedra FS ten mimbres máis que comprobados como para reeditar campionato. Para mostra, que o cuarto gol, nada máis saír de vestiarios, faino un gañador de todo co Barça e un máis de 100 veces internacional con España como Aicardo.

Nun lugar distinto está o Filial noiés. Como todo equipo mozo nas primeiras instancias dunha temporada, e máis cos cambios producidos, os de Chipi continúan en construción. Iso si, o que non se negocia é o esforzo. Así o demostraron sostendo o marcador cun menos tras a expulsión de Hugo e, a continuación, reducindo diferenzas co tanto de Koeman. Aí chegou o mellor tramo dos brancos no encontro, tomando o peso do mesmo por medio das incorporacións do meta Mosquera ao ataque.

Porén, o gol de Said en acción de estratexia freou ese ímpetu. Chipi introduciu o porteiro-xogador con Brais, e, a pesar de realizar bos movementos coa superioridade, o Exlabesa Leis penalizou en todas as súas recuperacións e engadiu tres dianas máis ao marcador.

Próximo partido

O equipo filialista desprazarase á pista do Piensos Durán Albense FS o vindeiro domingo 21 ás 13:00h pola 2ª xornada ligueira.

---

Ficha técnica

Noia Portus Apostoli FS “B”: Mosquera (p), Nico Cuello, Koeman, Iago López e Brais. Tamén xogaron Álvaro Varela, Teo, Jaime Pan, Álvaro, Hugo, Saúl, Jorge (c) e Oliver Chenel.

Exlabesa Leis Pontevedra FS: Dani Pérez (p), Aicardo, Iván Domínguez, Mario Paz e Said. Tamén xogaron Nicolás Crespo (c), Samuel, Dani Zore, Bruno e Arroyo.

Goles: 0-1 Said (3’), 0-2 Dani Zore (8’), 0-3 Arroyo (19’), 0-4 Aicardo (21’), 1-4 Koeman (29’), 1-5 Said (34’), 1-6 Nicolás Crespo (37’), 1-7 Dani Pérez (38’), 1-8 Dani Pérez (39’).

Os árbitros Lidia Crespo Pardo e Adrián Buján Barciela amoestaron con tarxeta amarela nos noieses a Jorge (6’), Hugo (6’ e 27’), Álvaro Varela (11’), Brais (12’) e o adestrador Chipi (27’). Nos pontevedreses, amarelas a Dani Zore (12’) e Iván Domínguez (31’).

Incidencias: partido correspondente á xornada 1 do Grupo 1 da Segunda División “B” FS, disputado no Municipal Agustín Mourís ante uns 300 espectadores.