CRÓNICA X12 SEGUNDA DIVISIÓN “B” FS (NPA “B” 1–2 VIL) | Só faltou o gol

Sábado, 29/11/2025 · 16:19h · Imaxe: Manuel Lorenzo/Noia PA FS | O equipo de Chipi dominou o tempo e as ocasións, pero non acertou e acabouno pagando a dous minutos do final.

Derrota do Noia Portus Apostoli FS “B”, que pola súa actuación quizais mereceu mellor sorte na visita ao Mourís dun Grupo FORMA-T Vilalba FS que sostivo as acometidas noiesas e levou a palma cun gol a dous minutos do final.

Os vilalbeses adiantáronse no minuto 9, cun gran pase de Isma definido á perfección por Antón. Para ese momento, o Filial noiés xa superar un inicio dubitativo, principalmente a través das incorporacións ao ataque do seu porteiro Mosquera. Nunha delas chegou o tanto do empate, con Mateo Varela cazando un balón solto na área para o 1-1 que amosaría o electrónico no camiño a vestiarios, a pesar de varios intentos de ambos cadros por desnivelalo.

Mateo Varela estreou a súa conta goleadora | Imaxe: Manuel Lorenzo/Noia PA FS

Non houbo maneira

O segundo acto foi un monólogo dos filialistas. Entre as numerosas oportunidades, destacaron as de Hugo, Nico Cuello, Oliver Chenel ou Brais que quedaron moi preto de darlle a vantaxe aos seus.

Porén, a dous minutos do final o Grupo FORMA-T Vilalba FS aproveitou unha das pouquísimas que dispuxo para colocar o 1-2. Con Teo de porteiro-xogador, os de Chipi buscaron polo menos rascar un punto, pero non era o día. Despois de cinco xornadas sumando, os brancos cederon ante un gran rival, aínda que cos seus 23 puntos asegúranse continuar unha semana máis entre os mellores do campionato.

Próximo partido

O Filial visitará ao 5 Coruña FS o sábado 6 de decembro ás 18:30h pola xornada 13 ligueira.

---

Ficha técnica

Noia Portus Apostoli FS “B”: Mosquera (p), Hugo, Nico Cuello, Teo e Oliver Chenel. Tamén xogaron Koke (p), Mateo Varela, Brais, Cepeda e Jorge (c).

Grupo FORMA-T Vilalba FS: César Quijada (p) (c), Isma, Antón, Longo e Kevin Chis. Tamén xogaron Héctor, Fari, Dieguito e Hugo Beceiro.

Goles: 0-1 Antón (9’), 1-1 Mateo Varela (15’), 1-2 Dieguito (38’).

Os árbitros Miguel Jesús Rodríguez Pontanilla y Álvaro Sobral Moreno amoestaron con tarxeta amarela nos noieses a Brais (33’) e o adestrador Chipi (40’). Nos vilalbeses, amarelas a Isma (34’) e Longo (39’).

Incidencias: partido correspondente á xornada 12 do Grupo 1 da Segunda División “B” FS, disputado no Municipal Agustín Mourís de Noia ante uns 250 espectadores.