“Noia, Portus Apostoli!”: este é o novo canto para apoiar aos nosos

Martes, 30/09/2025 · 19:08h · Imaxe: Foto Pichero | Escrito polos afeccionados Benito Dosil e Juan Ramos, soou por primeira vez no descanso do duelo ante Viña Albali Valdepeñas.

Que o Noia Portus Apostoli FS é O Sentimento dunha Vila queda claro, en gran medida, pola súa afección. A que anima sen cesar, a que sostén ao equipo nos peores momentos e, tamén, a que crea identidade e folclore. Se hai dúas temporadas dela naceu o que é o noso himno, agora xorde un novo canto: “Noia, Portus Apostoli!”.

Goza da canción coa súa letra.

Os autores desta obra musical, realizada no estudo de son “O Son da Meiga”, de Santiago de Compostela, son os seareiros Benito Dosil (creador da letra) e Juan Ramos (voz e guitarras), coa colaboración de Virxilio Fernández (mestura) e Juanma Varela (baixo). A súa letra e composición irradian ritmo e emoción, co lema “Vamos Noia, vamos Noia” capitaneando unha serie de arengas ideais para alentar ao equipo noiés.

A canción soará en cada partido do Noia Portus Apostoli FS no Agustín Mourís á saída dos dous conxuntos para a disputa da segunda parte. Así sucedeu na súa estrea, o pasado sábado no choque contra Viña Albali Valdepeñas.