top of page

PREVIA X9 (adiantado) PRIMEIRA DIVISIÓN FS | Illes Balears Palma Futsal - Noia Portus Apostoli FS | A polo aínda máis difícil

  • Writer: Departamento prensa Noia PA FS
    Departamento prensa Noia PA FS
  • Oct 19
  • 3 min read
Domingo, 19/10/2025 · 18:24h · Imaxe: Foto Pichero | Os noieses batallarán nun practicamente inexpugnable Son Moix (lun. 20/10, 19:30h. TV: LALIGA+) por lograr a que sería unha histórica cuarta vitoria ligueira consecutiva.
Domingo, 19/10/2025 · 18:24h · Imaxe: Foto Pichero | Os noieses batallarán nun practicamente inexpugnable Son Moix (lun. 20/10, 19:30h. TV: LALIGA+) por lograr a que sería unha histórica cuarta vitoria ligueira consecutiva.

A xornada 9 chega antes de tempo para o Noia Portus Apostoli FS. Por motivo da Copa Intercontinental que disputará Illes Balears Palma Futsal, a viaxe á illa que tocaba en novembro adiántase a este luns 20 de outubro ás 19:30h, un atípico día no que os noieses buscarán dar a sorpresa e lograr a súa cuarta vitoria seguida.


No deporte non existe mellor xute de enerxías que gañar. E máis, se é de maneira épica e contra todo un actual bicampión ligueiro. O que viviu o Noia o pasado sábado no Agustín Mourís foi o fiel reflexo da confianza que posúe o equipo, cuxos resultados están correspondendo ao bo facer e á insistencia ata o final despregada polos brancos.


Os noieses terminaron as probas no Polideportivo Joan Seguí | Imaxe: Manuel Lorenzo/Noia PA FS
Os noieses terminaron as probas no Polideportivo Joan Seguí | Imaxe: Manuel Lorenzo/Noia PA FS

Neste momento de forma, que xurda a oportunidade de xogar un partido en 'semana de parón' só pode ser sinónimo de alegría. A que invade a un Portus Apostoli ante a opción de conseguir o seu cuarto triunfo consecutivo por vez primeira na elite.


Illes Balears Palma Futsal apela ao seu fortín


A poucos rivais coñece máis o cadro noiés que ao Illes Balears Palma Futsal (4º con 11 puntos). Hai pouco menos de dous meses, ambos bloques víanse as caras no VIII Trofeo Portus Apostoli, no que o Noia levou o gato á auga. Pero esta vez o enfrontamento producirase nun Son Moix onde os galegos nunca sumaron e os de Antonio Vadillo son practicamente invencibles: desde o 27 de abril de 2024 non perden como locais os baleares en Liga regular. Incluído o duelo da 5ª data, disputado no Pavillón de Galatzó, en Calvià, polas obras do seu habitual fortín. A el regresa o tricampión de Europa e bicampión do Mundo este luns, coa mente en deixar atrás a derrota ante O Parrulo na pasada xornada. Nas filas palmesanas militan os ex noieses Machado e Alisson, membros dun dos mellores elencos do planeta, plagado de calidade e alternativas, no que tamén figuran os Rivillos, Fabinho, Charuto, Luan Müller ou Lucão, entre outros.



Declaracións previas


O desprazamento

Pasaxeiros ao avión na mañá do domingo, con chegada ao hotel de concentración sobre as 10:00h. A continuación, os noieses realizaron o derradeiro adestramento previo ao partido no Polideportivo Joan Seguí.


Emisión en directo

O duelo contará coa emisión en directo e en exclusiva a través de LALIGA+ (baixo subscripción), por web e app, este luns 20 a partir das 19:30h.


Árbitros

Diego Corredor Corredor, do comité andaluz, e Ricardo García-Carpintero López, do comité castelán-manchego. Balance dunha derrota con esta parella.


Precedentes (balance oficial: 1V-2E-6D)

·19 de novembro de 2022 | X9 Primeira División FS 2022/2023 | NPA 2-2 IBP


·21 de febreiro de 2023 | 1/4 de final Copa do Rei FS 2022/2023 | IBP 4-2 NPA


·25 de marzo de 2023 | X24 Primeira División FS 2022/2023 | IBP 5-1 NPA


·24 de maio de 2023 | PlayOff Primeira División FS 2022/2023 - 1/4 de final – Partido 1 | IBP 8-2 NPA


·27 de maio de 2023 | PlayOff Primeira División FS 2022/2023 – 1/4 de final – Partido 2 | NPA 3-4 IBP (AET)


·11 de novembro de 2023 | X10 Primeira División FS 2023/2024 | IBP 2-1 NPA


·31 de marzo de 2024 | X25 Primeira División FS 2023/2024 | NPA 6-1 IBP


·11 de xaneiro de 2025 | X14 Primeira División FS 2024/2025 | NPA 3-3 IBP


·4 de abril de 2025 | X25 Primeira División FS 2024/2025 | IBP 4-2 NPA

Comments


bottom of page