PREVIA X6 PRIMEIRA DIVISIÓN FS | Noia Portus Apostoli FS – Jimbee Cartagena Costa Cálida | O ‘factor Mourís’, a proba contra o bicampión

Departamento prensa Noia PA FS
Oct 10
3 min read

Venres, 10/10/2025 · 17:00h · Imaxe: Foto Pichero | O cadro branco testa a súa gran dinámica e a xeira positiva como local contra o líder e vixente campión ligueiro (sáb. 11/10, 17:00h. TV: LALIGA+).

A inercia positiva do Noia Portus Apostoli FS ponse a proba este sábado 11 ás 17:00h, cando recibirá no seu fortín, o Municipal Agustín Mourís, ao Jimbee Cartagena Costa Cálida, líder e vixente bicampión ligueiro, pola sexta xornada da competición.

Desde abril de 2024 non gañaba dous partidos consecutivos o Portus Apostoli en Liga. O golazo de Altamirano a 1’21’’ do final en Anaitasuna rompeu esa racha e prolongou outra, a das boas sensacións e a alta confianza dun vestiario unido, comprometido e con ganas de seguir mellorando un inicio de curso que xa é dos mellores da historia do Club.

**O bo ambiente reina no grupo | Imaxe: Manuel Lorenzo/Noia PA FS**

O reto desta xornada é de gran dificultade, pero coa afección noiesa e o Municipal Agustín Mourís todo se achanda máis para o cadro de David Palmas. Dío a lóxica e tamén os números: desde febreiro non perde o Noia como local. Esta campaña, empate ante Jaén Paraíso Interior FS e vitoria fronte a Viña Albali Valdepeñas. Outra racha favorable aos brancos que se enfronta a unha proba de lume este sábado.

Un Jimbee esixido pero en bo momento

Precisamente, ao rival desta xornada dáselle moi ben o Mourís. O Jimbee Cartagena Costa Cálida logrou tres triunfos en tres partidos na cancha noiesa. Anos nos que o equipo de Duda medrou ata o que é hoxe, todo un bicampión ligueiro e terceiro clasificado na UEFA Futsal Champions League. E é pola súa segunda participación consecutiva na competición continental que o cuadro meloneiro chega á Vila especialmente esixido polo calendario, ademais das baixas. Este pasado mércores tiveron que disputar o duelo adiantado da 8ª data, conseguindo unha in extremis igualada a dous tantos na pista de Movistar Inter FS. Un resultado que lles permite manterse líderes e invictos (4 triunfos e 2 empates), demostrando a súa condición de equipazo en todas as liñas, con varios internacionais e alternativas.

Declaracións previas

Entradas

Á venda na páxina web noiafs.compralaentrada.com/eventos. Se quedan dispoñibles, poñeranse á venda na porta de acceso do Municipal Agustín Mourís o día do partido a partir das 15:30h.

Emisión en directo

O duelo contará coa emisión en directo e en exclusiva a través de LALIGA+ (baixo subscripción), por web e app, este sábado 11 a partir das 17:00h.

Árbitros

Sergio Sánchez Llorente e Víctor Toca Campo, do comité cántabro. Balance dun empate e catro derrotas con Sánchez Llorente; catro perdidos con Toca Campo.