PREVIA X2 PRIMEIRA DIVISIÓN FS | Noia Portus Apostoli FS – Jaén Paraíso Interior FS | Estréase o Mourís

Departamento prensa Noia PA FS
3 days ago
3 min read

**Luns, 08/09/2025 · 19:03h · Imaxe: Manuel Lorenzo/Noia PA FS | Os noieses abren o pano da competición oficial ao seu feudo na intersemanal segunda xornada (mar. 09/09, 20:00h. TV: LALIGA+).**

Segunda parada do sprint inaugural da Primeira División FS. Ao Noia Portus Apostoli FS tráelle a súa estrea como local, no Mourís, ante a súa xente, este martes 9 a partir das 20:00h. Como opoñente terán a un dos ósos máis duros da categoría, o Jaén Paraíso Interior FS, que lle poñerá moi difícil a empresa de lograr o primeiro triunfo.

O que se resistiu o pasado sábado en Manzanares, nun disputado partido que os noieses viron escaparse nos pequenos detalles que marcan diferenzas. Sen apenas tempo para preparar esta segunda data, o Portus Apostoli levou de terras manchegas a lección de corrixir erros atrás e afinar a puntería diante para achegarse aos puntos nunha Liga na que a liña entre sumar ou non é cada vez máis fina.

Apenas dúas sesións para ensaiar antes do encontro | Imaxe: Manuel Lorenzo/Noia PA FS

O resto, poñerao o Agustín Mourís. Se unha trintena de afeccionados noieses xa se fixeron notar lonxe da Vila, no feudo blanco serán aínda máis sonoros para darlle o sustento e a forza aos seus de cara a empezar a construír un fortín.

Co Jaén volve un noiés

O primeiro visitante da temporada é o Jaén Paraíso Interior FS, cadro ao que os brancos nunca lograron superar. Preto estiveron hai uns meses, nun partido que terminou con empate a un tanto. Os de Dani Rodríguez son un dos equipos máis recoñecibles do campionato pola súa solidez, competitividade e capacidade de aproveitar calquera erro do rival. Iso si, os amarelos tampouco están exentos de calidade. O gol de Mati Rosa, a elegancia de Alan Brandi, o descaro de Dani Zurdo, a seguridade e versatilidade en portería de Espíndola e Dudu, etc. E a todo iso uniron a algo máis que un vello coñecido da parroquia noiesa con Power Raggiati. O ex xogador branco reforzou ao equipo xienense xunto a Rikelme, Pablo Ordóñez, Bynho, Esteban e Mareco. Un plantel capaz de loitar por títulos que acudirá este martes ao Mourís co seu casilleiro tamén por estrear, tras caer na casa ante Viña Albali Valdepeñas (4-5) na xornada inicial.

Declaracións previas

Entradas

Á venda na páxina web noiafs.compralaentrada.com/eventos. Se quedan dispoñibles, poñeranse á venda na porta de acceso do Municipal Agustín Mourís o día do partido a partir das 18:30h.

Emisión en directo

O duelo contará coa emisión en directo e en exclusiva a través de LALIGA+, por web y app, este martes 9 a partir das 20:00h.

📺 Emisión EN DIRECTO

Árbitros

Héctor Mayo López e Carlos Panadero Díaz-Concha, do comité madrileño. Balance de dúas vitorias, catro empates e tres derrotas con esta parella.