PREVIA X20 PRIMEIRA DIVISIÓN FS | Noia Portus Apostoli FS – Industrias Santa Coloma | A deixar o obxectivo a tiro

56 minutes ago
3 min read

Xoves, 26/02/2026 · 17:00h · Imaxe (de arquivo): Manuel Lorenzo/Noia PA FS | Os brancos buscan desquitarse dunha semana pasada sen premio cunha victoria clave para aproximarse á permanencia virtual (ven. 27/02, 20:00. TV: LALIGA+). — Xoves, 26/02/2026 · 17:00h · Imaxe (de arquivo): Manuel Lorenzo/Noia PA FS | Os brancos buscan desquitarse dunha semana pasada sen premio cunha victoria clave para aproximarse á permanencia virtual (ven. 27/02, 20:00. TV: **LALIGA+**).

Terceiro partido seguido na casa despois do parón para o Noia Portus Apostoli FS. O conxunto noiés recibirá ao Industrias Santa Coloma este venres 27 ás 20:00h, horario inédito no Agustín Mourís, nun duelo directo correspondente á 20ª xornada da Primeira División FS.

Dío a clasificación e o momento: é unha cita moi importante na persecución do obxectivo da permanencia. 11º con 24 puntos e pendente o partido aprazado da xornada 18 ante Servigroup Peñíscola FS -que se disputará o martes 3-, os noieses están en disposición de dar un novo paso de xigante cara a salvación. Por achegarse a eses 30 que, virtualmente, aseguran a categoría e porque diante estará un rival a tan só 3 puntos dos brancos.

**Biel, nun bo momento con 4 goles nos últimos 2 partidos | Imaxe: Manuel Lorenzo/Noia PA FS**

Ademais, os de David Palmas, que en principio poderá contar con todos os seus efectivos menos Leozin, teñen ganas de darlle á súa afección esa vitoria que, cruelmente, se resistiu a semana pasada en dúas ocasións. Recompensar aos seus e continuar mirando cara arriba poñendo terra de por medio coa parte perigosa da clasificación, os motores que moven ao Portus Apostoli para loitar polo triunfo.

Vén o mellor Industrias do curso

A visita a Noia chega para o Industrias Santa Coloma en, probablemente, o seu momento máis feliz dunha complicada temporada. Por primeira vez enlazan tres xornadas consecutivas sumando, co triunfo ante Viña Albali Valdepeñas (3-2) previo ao parón e o empate en Ferrol (2-2) e a vital vitoria contra ATP Iluminación Ribera Navarra FS (4-3) posteriores, nunha serie que se completa con 10 dos últimos 15 puntos no saco. Desta maneira, os de Xavi Closas sitúanse 13º con 21 unidades e un colchón de 7 sobre o descenso. Os colomenses identifícanse cun estilo de xogo vertixinoso e combinativo, ademais de xuventude e proxección. É o caso de Leandrinho, que con 15 goles é un dos máximos realizadores do campionato. Nas filas do decano do fútbol sala español milita un ex noiés, Marcos Ferreyra. Dous eran ata xaneiro, cando anunciou a súa retirada Nil Closas.

Declaracións previas

https://www.youtube.com/watch?v=29mTm1xsVm0

https://www.youtube.com/watch?v=NxmfpoNinDk

Entradas

Á venda na páxina web noiafs.compralaentrada.com/eventos. Se quedan dispoñibles, poñeranse á venda na porta de acceso do Municipal Agustín Mourís o día do partido a partir das 18:30h.

Emisión en directo

O duelo contará coa emisión en directo e en exclusiva a través de LALIGA+ (baixo subscripción), por web e app, este venres 27 a partir das 20:00h.

Árbitros

Alejandro Martínez Flores, do comité murciano, e Pablo Delgado Sastre, do comité valenciano. Dúas vitorias, dous empates e unha derrota con Martínez Flores; un gañado, un empatado e un perdido con Delgado Sastre.