PREVIA X1 LIGA PRIME FUTSAL – TORNEO APERTURA | Noia Portus Apostoli FS – ElPozo Murcia Costa Cálida FS | Primeira páxina do quinto capítulo entre os mellores

1 hour ago

3 min read

Venres, 11/09/2026 · 16:30h · Imaxe: Foto Pichero | O cadro noiés recibe ao flamante supercampión (sáb. 12, 20:30h. TV: DAZN) para dar comezo á súa quinta campaña nunha renovada elite do fútbol sala nacional.

O agardado momento xa está aquí. O Noia Portus Apostoli FS dará o bandeirazo de saída á súa quinta temporada na elite, a renovada Liga Prime Futsal, este sábado 12 a partir das 20:30h no Municipal Agustín Mourís. Diante, nada máis e nada menos que o recente proclamado supercampión de España, ElPozo Murcia Costa Cálida FS.

Como sempre, o inicio do novo curso vén cargado de emocións e ilusións para equipo e afección, reforzadas polo bo sabor de boca que deixou a campaña 2025/2026 e a positiva pretemporada concluída o pasado venres en Ferrol. Agora, chega o momento da verdade, e os de David Palmas terán que dar un acertado paso á fronte para traballar desde xa en cumprir o obxectivo nunha competición cada ano máis igualada e esixente.

**Semana de traballo con motivación especial | Imaxe: Manuel Lorenzo/Noia PA FS**

Así foi nas anteriores catro, e así o será nesta quinta. Un lustro de fútbol sala da máxima elite en Noia, como a que recibirá na estrea dun campionato ligueiro 2026/2027 para o que os noieses prometen, unha vez máis, dalo todo para traer a mellor tolemia do mundo ao Mourís e á súa xente.

De primeiro, plato forte

Nove anos despois, ElPozo Murcia Costa Cálida FS volveu a erguer un título o pasado domingo. A conquista da Supercopa de España no Palau, superando ao Illes Balears Palma Futsal (8-4) e na final ao anfitrión Barça (5-4) supón un inmellorable arranque a unha ambiciosa temporada para os murcianos. O seu pasado subcampionato na Liga, para a que se presentan como un dos favoritos, clasificounos á UEFA Futsal Champions League. Para afrontar estas competicións de xigante, o que sempre foi ElPozo, os de Josan González incorporaron a Antonio Navarro, Santa Cruz, Pachu e Drahovsky, todos eles xogadores de probada calidade que sumarán a un plantel xa de por si cargado cos Marcel, Ricardinho, Gadeia, Dener, Ricardo ou o ex noiés Rivera.

Declaracións previas

https://youtu.be/gWx5Xt6_4YI

https://youtu.be/afxEyWWtgPw

Entradas

ABONADOS

GRATIS. Non teñen que mercar entrada, soamente deben presentar o seu carnet de abonado/a na porta de acceso ao Municipal Agustín Mourís.

Lembramos a todos os abonados que non vaian a asistir ao encontro a posibilidade da cesión do seu asento a disposición do Club. O procedemento pódese levar a cabo na plataforma online noiafs.compralaentrada.com, no apartado “liberar o meu asento”.

NON ABONADOS

·XERAL (+16 anos): 20€

·MOZO (-16 anos): 10€

Ao momento da entrada ao Municipal, revisarase a idade de todas as persoas que acudan cunha entrada MOZO (-16 anos).

Á venda na páxina web noiafs.compralaentrada.com/eventos. Se quedan dispoñibles, poñeranse á venda na porta de acceso do Municipal Agustín Mourís o día do partido a partir das 19:00h.

Emisión en directo

·En España, en directo e en exclusiva a través de DAZN (baixo a subscripción ‘Premium’ ou ‘Fútbol’).

·En Brasil, en directo e en exclusiva a través de Canal Gol Brasil.

Árbitros

Daniel Navarro Hernández e Jesús Almeida León, do comité palmense. Primeiro partido que arbitrará Daniel Navarro aos noieses na elite; con Jesús Almeida, unha vitoria nun partido.