Pirata, gran protagonista nos premios de final de temporada da Peña Frente Berberecho

Mércores, 28/05/2025 · 12:50h · Imaxe: Foto Pichero | O lucense levou os trofeos a xogador máis regular e máximo goleador da temporada.

A Peña Frente Berberecho celebrou, como vén sendo habitual as últimas campañas, este martes un acto a modo de convivencia e despedida da temporada entre equipo e afección, no que entregaron os trofeos a xogador máis regular e máximo goleador da temporada a Pirata, ademais doutros recoñecementos.

Ao evento asistiron directiva, plantel e corpo técnico do Club. Tamén representantes da corporación municipal do Concello de Noia, como é o caso de Santiago Rodríguez, concelleiro de deportes, e Laura Salgado, concelleira de obras, urbanismo, xuventude e relacións institucionais.

Coa suma dos votos emitidos despois de cada partido, os socios da Peña elixiron a Pirata como xogador máis regular do equipo este curso. O capitán levou tamén o premio a mellor xogador do mes de abril e o de máximo goleador, con 21 dianas en Primeira División FS. David Pazos foi o outro galardoado da tarde-noite, recibindo o trofeo a mellor xogador de maio.