Manzanares, terra hostil

Departamento prensa Noia PA FS
Sep 3
2 min read

**Mércores, 03/09/2025 · 19:46h · Imaxe: Manuel Lorenzo/Noia PA FS | Os noieses tratarán de romper no debut ligueiro unha estatística negativa que arrastran desde 2018.**

O Noia Portus Apostoli FS arrancará a Primeira División FS 2025/2026 este sábado 6 de setembro ás 16:00h. O escenario, Manzanares. Ou, o que é o mesmo, un lugar que durante os anos só lle deu as costas no marcador. Xa fora antes no Municipal Antonio Caba ou agora no Manzanares Arena, non é que os noieses nunca gañaran na cidade manchega, senon que só coñecen a derrota.

A desafortunada estatística comezou o 21 de abril de 2018, en Segunda, cun resultado de 4-1, e o seu último episodio ata a data deuse o 24 de novembro de 2024, cando los manzanareños prevaleceron por 2-0 na xornada 8 do pasado curso ligueiro. En total, sete enfrontamentos e sete vitorias para o Quesos El Hidalgo Manzanares FS, a pesar do empeño noiés en cada un dos duelos por levar o gato á auga. Curiosamente, no Agustín Mourís o balance sorrí de maneira destacada aos brancos, con cinco triunfos, un empate e unha derrota.

Imaxe: Manuel Lorenzo/Noia PA FS | O 1-0 en 2021, a vez que máis preto estivo de romperse.

Por tanto, este sábado o Portus Apostoli non só loitará por empezar a nova temporada con bo pé e uns importantes tres puntos. Senon que tamén o fará por romper coas estatísticas e mudar a historia. Algo que os noieses xa fixeron en Primeira División FS máis dunha vez, coa ambición de seguir facéndoo na súa cuarta incursión na categoría.