Izan renova ata xuño de 2028 e xogará cedido en Burela a temporada 25/26

Mércores, 23/07/2025 · 16:00h | Tras un ano entre Filial e Primeiro Equipo, o peche de 20 anos asina por tres cursos co Club e seguirá medrando na súa formación a préstamo no cadro burelés.

O Noia Portus Apostoli FS e o xogador Izan alcanzaron un acordo para asinar un contrato que unirá ao peche co Club ata o 30 de xuño de 2028, tres temporadas das cales pasará a primeira, esta 2025/2026, en calidade de cedido no CD Burela FS para continuar coa súa progresión.

Izan, de 20 anos recentemente cumpridos, chegou ao Portus Apostoli o pasado curso desde o ED Vigo 2015 FS para reforzar a un Filial que realizaba un histórico debut na Segunda División “B” FS. Decontado se converteu nun dos imprescindibles de Guille Murillo, algo que delatan tamén os seus números goleadores, con 20 dianas en 25 partidos disputados.

Froito do seu bo facer, Izan entrou rápido en dinámica do Primeiro Equipo, presente en moitos dos adestramentos baixo as ordes de David Palmas e chegando a participar en catro partidos ligueiros e dous de Copa Galicia FS, incluída a final.

Un claro crecemento sobre o que o Club quere seguir apostando, ampliando a súa vinculación ata 2028, e moldeando, neste caso cunha cesión a un CD Burela FS co que mantén boas relacións e a unha categoría como a Segunda División FS que supón outro ambicioso reto no que seguir dando importantes pasos adiante na aínda curta carreira deportiva de Izan.

Moita sorte nesta emocionante aventura, Izan! Agardámoste pronto!