Martes, 20/08/2024 · 11:30h · Imaxe: Manuel Lorenzo/Noia PA FS | Primeira sesión con protagonismo para o balón e o aspecto físico.
Agora si, o Noia Portus Apostoli FS 2024/2025 xa pisa parqué. Tras a presentación interna e levar a cabo as valoracións físicas iniciais de cada xogador, o conxunto noiés realizou na tarde deste luns 19 a primeira sesión de adestramento, dando apertura a unha pretemporada de 7 semanas na que se quentarán motores para chegar ao máximo nivel ao arranque ligueiro, a fin de semana do 12 e 13 de outubro.
En total, 16 futbolistas formaron parte da primeira sesión de pretemporada, desenvolta integramente en pista pero con enfoque principal no físico. Entre eles, 13 xogadores do Primeiro Equipo máis 3 filialistas, os casos do peche Lucho, o á Jorge e o gardameta Iván, que por segundo curso seguido volverá a compaxinar dinámica do cadro principal coa do Filial. Ademais dos sete reforzos (Schütt, Peixe, Montero, Diego Fávero, Rubi, Álex García e Garrincha), a gran novidade foi Attos, que, desde que caera lesionado en febreiro, realizou o seu primeiro adestramento co grupo, adaptado ao estado actual da súa fase de recuperación. As únicas ausencias foron Power Raggiati e Altamirano, concentrados con Arxentina na preparación para o Mundial de Usbequistán 2024.
Un cambio no calendario de partidos de pretemporada
Como se anunciou o pasado xullo, 7 amistosos de pretemporada xogará o Portus Apostoli entre o 31 de agosto e o 5 de outubro. De todos eles, un mudou de data con respecto ao primeiramente indicado, quedando o calendario da seguinte maneira, a expensas de posibles novas alteracións:
·O Parrulo Ferrol FS vs Noia Portus Apostoli FS | Sábado 31 de agosto | Ferrol
·Noia Portus Apostoli FS vs Pescados Rubén Burela FS | Sábado 7 de setembro | Bertamiráns
·ADCR Caxinas Poça Barca vs Noia Portus Apostoli FS | Sábado 14 de setembro | Vila do Conde (Portugal)
·Pescados Rubén Burela FS vs Noia Portus Apostoli FS | Xoves 19 de setembro | Burela
·VII Trofeo Portus Apostoli (formato triangular) | Do venres 27 ao domingo 29 de setembro | Rivais pendentes de anunciar | Noia
·SC Braga vs Noia Portus Apostoli FS | Sábado 5 de outubro | Braga
Comments