Setembro dá inicio á competición

Martes, 02/09/2025 · 09:51h · Imaxe: Foto Pichero | Catro partidos de Liga no primeiro mes con compromisos oficiais.

Despois dun satisfactorio agosto de ensaios, chega o que todos estaban agardando. Co mes de setembro empeza a competición, que trae para o Noia Portus Apostoli FS os partidos das primeiras catro xornadas ligueiras.

Deses, tres sucederanse en menos dunha semana. O debut producirase este sábado 6 ás 16:00h na pista do Quesos El Hidalgo Manzanares FS. Tres días despois, o martes 9 ás 20:00h, os noieses estrearanse na casa recibindo ao Jaén Paraíso Interior FS, partido para o que xa están á venda as entradas. Este sprint inicial terá o seu fin visitando ao ElPozo Murcia Costa Cálida FS o venres 12 ás 20:00h.

Tras un parón de dúas semanas por datas FIFA no que a Selección Española xogará dous amistosos, o Portus Apostoli enfrontarase no Agustín Mourís ao Viña Albali Valdepeñas de Marlon Velasco, nun partido con programación para a fin de semana do 27 de setembro, pero sen data e hora definitivos confirmados.

O bo xa está aquí. É hora de dar os primeiros pasos competitivos da temporada 2025/2026, e o Noia Portus Apostoli FS está preparado para levalos a cabo con ilusión e esixencia.