Un outubro de quilómetros

Mércores, 01/10/2025 · 17:22h · Imaxe: Foto Pichero | Os noieses xogarán catro partidos neste segundo mes de competición, dos cales tres serán lonxe da casa.

Maleta, manta e autobús/avión serán palabras moi utilizadas polo Noia Portus Apostoli FS en outubro. E é que dos catro partidos que disputarán os de David Palmas durante este mes, tres serán como visitantes.

Empezando polo da xornada 5 ligueira, este venres 3 ás 19:00h en Pamplona ante Osasuna Magna. Cuarta visita noiesa ao Pavillón Anaitasuna, onde só logrou sumar na primeira ata a data, cunha vitoria por 3-6. A continuación, chegará o único encontro como locais do mes. Sábado 11 ás 17:00h contra o actual bicampión ligueiro, Jimbee Cartagena Costa Cálida pola xornada 6. Un exame de altura para o “factor Agustín Mourís”, que mantén aos seus sen perder na casa desde febreiro.

Un triunfo e un empate esta campaña na casa | Imaxe: Foto Pichero

Despois toca fin de semana de parón de seleccóns, aínda que si haberá competición para os brancos. Por causa da disputa da Copa Intercontinental por parte do Illes Balears Palma Futsal o 7 de novembro, o duelo da xornada 9 contra os baleares en Son Moix adiántase ao luns 20 de outubro ás 19:30h. Cinco días máis tarde, o sábado 25 ás 18:00h, o mes acaba coa 7ª data do campionato doméstico na cancha do ATP Iluminación Ribera Navarra FS, onde o Portus Apostoli só coñece a vitoria nos seus precedentes anteriores.

Vista en agosto e setembro a fortaleza do conxunto noiés no Agustín Mourís, chega outubro para poñer a proba as capacidades máis aló das fronteiras do seu feudo. Concretamente, 2800 quilómetros máis aló, incluíndo só a ida.