Agosto, mes de probas

Venres, 01/08/2025 · 20:22h · Imaxe: Foto Pichero | Catro partidos, todos eles amistosos, no groso da pretemporada 2025/2026.

Empeza o mes de agosto e, con el, a conta atrás para os primeiros partidos do novo Noia Portus Apostoli FS. Ata catro amistosos disputará o elenco dirixido por David Palmas no mes previo ao inicio da Primeira División FS, coa pretensión de afinar todos os detalles e conceptos traballados nas sesións de adestramento.

Para a estrea, os nosos desprazaranse a Bueu, máis concretamente ao Municipal Pablo Herbello, o martes 12 ás 20:30h. Alí, enfrontaranse ao ADCR Caxinas, rival da Liga Placard portuguesa habitual das últimas pretemporadas que esixirá ao máximo no aspecto actitudinal.

Tan só catro días despois, o sábado 16 ás 20:00h, o Municipal de Bertamiráns será testemuña dun cara a cara entre os dous equipos galegos da máxima categoría, os noieses e O Parrulo Ferrol FS. Primeiro duelo contra un rival que se atoparán os nosos na Liga e que, ademais, terá ese especial aliciente como previa dos derbis oficiais.

Por segundo ano seguido, derbi amistoso de Primeira en Bertamiráns | Imaxe: Manuel Lorenzo/Noia PA FS

O sábado 23 o Portus Apostoli disputará o seu primeiro partido da pretemporada no Municipal Agustín Mourís, recibindo a todo un SC Braga, outro vello coñecido das preparacións, en horario por determinar. Os bracarenses supoñerán outra reseñable pedra de toque, tendo en conta que o curso pasado xogaron UEFA Futsal Champions League e finalizaron terceiros na Liga.

E o último partido do mes e amistoso de pretemporada será o máis destacado por máis dun motivo. O primeiro, tratarase do VIII Trofeo Portus Apostoli; e o segundo, porque visitará Noia, o venres 29 en horario por determinar, o tricampión de Europa, Illes Balears Palma Futsal. A proba do algodón definitiva, a unha semana de comezar a Primeira División FS na pista do Quesos El Hidalgo Manzanares FS.