Leozin, presente e futuro para pechar o posto de pivote

Martes, 22/07/2025 · 13:19h | Acordo co Magnus Futsal para o traspaso del xogador brasileiro, que asina por dúas temporadas co Portus Apostoli.

O Noia Portus Apostoli e o Magnus Futsal chegaron a un acordo para o traspaso de Leonardo Mateus Periandro Calero Guida, “Leozin” (Valparaíso de Goiás, Goiás, Brasil. 03/12/2001), xogador brasileiro que asina para as dúas vindeiras temporadas co conxunto branco.

Leozin é un pivote destro de 23 anos, un dos proxectos máis interesantes na súa posición dentro do panorama do seu país. Potente e con capacidade tanto goleadora como de asociación cos seus compañeiros, levaba un puñado de cursos chamando a atención na LNF brasileira.

Tal é así que, desde xaneiro, xogaba no Magnus Futsal, equipo máis poderoso do campionato de Brasil. Antes, na súa carreira deportiva pasou por Brasília Futsal, Acel Chopinzinho (onde coincidiu con Douglas), o Sharjah FC dos Emiratos Árabes Unidos (co que gañou a Liga) e o Futsal São Lourenço. De alí coñece a Biel e Churrasco, outras dúas das cinco fichaxes que suma o Portus Apostoli 25/26 ata a data, xunto a Ismael e Varsalona.

Benvido a Noia, que xa é a túa nova casa, Leozin!