PREVIA X8 PRIMEIRA DIVISIÓN FS | Noia Portus Apostoli FS – Servigroup Peñíscola FS | Refuxiarse no fortín

Departamento prensa Noia PA FS
Oct 31
2 min read

Venres, 31/10/2025 · 19:51h · Imaxe: Foto Pichero | Os brancos regresan ao seu fogar (sáb. 01/11, 20:00h. TV: LALIGA+) coa misión e a intención de seguir convirténdoo na súa fonte principal de puntos.

Despois de dúas saídas consecutivas, o Portus Apostoli volve ao Agustín Mourís. Alí, na súa pista, disputará os seus dous próximos partidos, empezando polo deste sábado 1 de novembro a partir das 20:00h fronte ao Servigroup Peñíscola FS pola oitava xornada de Primeira División FS.

A semana de dobre desprazamento traduciuse en dúas derrotas que deixaron un sabor amargo no equipo branco. A pesar de ofrecer grandes momentos en ambos, os duelos en Palma e Tudela escapáronse por detalles no tramo final. Para quitarso, os de David Palmas buscarán refuxiarse nun Mourís que, desde finais de febreiro, só lle trae boas novas.

**Semana de traballo coa mente en volver á senda do triunfo | Imaxe: Manuel Lorenzo/Noia PA FS**

Oito partidos de Liga seguidos sumando en condición de local -ademais dun empate contra SC Braga e un triunfo ante Illes Balears Palma Futsal en amistosos- acumula o Portus Apostoli. Ademais diso, o cadro noiés ten a confianza dos 10 puntos no seu casilleiro. Coa súa xente, faise moito máis forte. Como na casa, en ningures. E este sábado ten unha nova oportunidade para demostralo e continuar mirando cara arriba na táboa.

Un Servigroup Peñíscola FS pendente de alzar o voo

Precisamente, o último equipo ata a data capaz de gañar como visitante en Noia foi o Servigroup Peñíscola FS. O campión da pasada Copa de España FS e da Liga regular 24/25 aterra na Vila nunha situación distinta á de hai uns meses. Os peñiscolanos, que este verán perderon a pezas clave como Pani ou Gauna, son 14º con 6 puntos e precisan unha vitoria para propulsarse na clasificación. Aínda así, Santi Valladares segue contando con moito talento nas súas mans e varios internacionais españois como Gus, Diego Quintela, Juanqui, Pablo Muñoz e Diego Sancho, entre outros nun potente e amplo plantel.

Declaracións previas

Entradas

Á venda na páxina web noiafs.compralaentrada.com/eventos. Se quedan dispoñibles, poñeranse á venda na porta de acceso do Municipal Agustín Mourís o día do partido a partir das 18:30h.

Emisión en directo

O duelo contará coa emisión en directo e en exclusiva a través de LALIGA+ (baixo subscripción), por web e app, este sábado 1 a partir das 20:00h.

Árbitros

Francesc García-Donàs Salvador e Iván López Galiano, do comité catalán. Con García-Donàs Salvador, balance de catro vitorias e unha derrota; con López Galiano, dúas derrotas en dous encontros.