PREVIA X4 PRIMEIRA DIVISIÓN FS | Noia Portus Apostoli FS – Viña Albali Valdepeñas | Volve a Liga cun duelo importante e especial

Departamento prensa Noia PA FS
Sep 26
3 min read

Venres, 26/09/2025 · 16:16h · Imaxe: Foto Pichero | Os noieses regresan á acción tras o parón por seleccións coa pretensión de lograr o primeiro triunfo ligueiro na volta de Marlon Velasco ao Agustín Mourís (sáb. 27/09, 18:00h. TV: LALIGA+).

O Noia Portus Apostoli FS reemprende este sábado 27 ás 18:00h o torneo ligueiro, despois dunha semana de parón por compromisos de seleccións, na casa e desexoso do primeiro “+3”. Será, ademais, nun encontro especial ante o Viña Albali Valdepeñas de Marlon Velasco, quen fora adestrador noiés durante case cinco temporadas.

Un empate e dúas derrotas para un montante total dun punto. Así alcanza o Portus Apostoli a cuarta xornada dunha Primeira División FS na que os equipos aínda buscan o seu lugar. Iso si, as sensacións en global son mellores do que reflicte o casilleiro. Sobre todo nun Agustín Mourís onde os de David Palmas queren afianzarse e seguir construíndo un fortín temible para calquera opoñente, como demostrou na xornada 2 contra Jaén Paraíso Interior FS.

Dúas semanas pensando nesta xornada 4 | Imaxe: Manuel Lorenzo/Noia PA FS

E iso pasa por conseguir estrear o apartado de triunfos do curso. Iso é o que persegue o bloque de xogadores e corpo técnico, que, a pesar de hándicaps, traballou duro durante estas dúas semanas, e tamén unha afección preparada para volver a ser ese imprescindible sexto xogador desde a grada en busca dunha tarde máxica no seu feudo.

Un Viña Albali Valdepeñas renovado da man de máis que un vello coñecido

Con tres vitorias e un empate en seis partidos, o Viña Albali Valdepeñas é, historicamente, un dos rivais más propicios do Noia en Primeira División FS. Aínda que os vinateros afrontan nesta 2025/2026 unha nova era, encabezada por nin máis nin menos que Marlon Velasco. O técnico que levara desde o banco ao Portus Apostoli a proezas como o ascenso e a primeira Copa Galicia FS entre as campañas 18/19 e 22/23, mudoulle a cara aos manchegos, con Lluc, outro protagonista principal daquela etapa, no seu staff. Revolución no plantel (9 chegadas, por agora, e 11 saídas) e ideas claras: competitividade e dinamismo que xa fan as delicias do Virgen de la Cabeza. O seu equipo empezou con 6 de 9 en puntos e, coñecendo ao que dirixe, aspira a máis.

Declaracións previas

Entradas

Á venda na páxina web noiafs.compralaentrada.com/eventos. Se quedan dispoñibles, poñeranse á venda na porta de acceso do Municipal Agustín Mourís o día do partido a partir das 16:30h.

Emisión en directo

O duelo contará coa emisión en directo a través de LALIGA+ (baixo subscripción, por web e app) e CMM Play (en aberto, por web e app) este sábado 27 a partir das 18:00h.

Árbitros

Antonio Jesús García Robles, do comité andaluz, e Tomás Santander Flamarique, do comité aragonés. Balance con García Robles de dous partidos perdidos e con Santander Flamarique de dúas vitorias e tres derrotas.