PREVIA X18 PRIMEIRA DIVISIÓN FS | Servigroup Peñíscola FS - Noia Portus Apostoli FS | Regresa a competición!

1 day ago
3 min read

Venres, 13/02/2026 · 15:26h · Imaxe: Foto Pichero | O cadro noiés reinicia a actividade ligueira visitando o Juan Vizcarro de Peñíscola (sáb. 14/02, 18:00h. TV: LALIGA+). — **Venres, 13/02/2026 · 15:26h · Imaxe: Foto Pichero | O cadro noiés reinicia a actividade ligueira visitando o Juan Vizcarro de Peñíscola (sáb. 14/02, 18:00h. TV:** **LALIGA+**).

A Primeira División FS regresa máis dun mes despois tras o fin do parón internacional, e para o Noia Portus Apostoli FS faino con visita ao Servigroup Peñíscola FS este sábado 14 ás 18:00h pola 18ª xornada.

Lonxe, excesivamente lonxe queda o último partido disputado polos noieses ata a data. Foi o sábado 10 de xaneiro, cun importante triunfo ante ATP Iluminación Ribera Navarra FS nas últimas rabexadas do Nadal. 34 días despois, en pleno Entroido, os brancos reactivan a persecución do obxectivo da permanencia. Unha vitoria colocaríaos coa mesma cantidade de puntos cos que se finalizou o pasado curso e a só tres dos famosos 30 que outorgan a salvación virtual. Este choque podería supoñer o debut dos reforzos invernais, Monteros e Gui Lima.

**Gui Lima (co balón), unha das posibles novedades | Imaxe: Manuel Lorenzo/Noia PA FS**

Por fin, regresa a Primeira División FS. Por fin, volve o Noia Portus Apostoli FS. Por diante, un mes de febreiro especial e ilusionante que empeza en Peñíscola con tres suculentos e moi relevantes puntos en xogo.

O Juan Vizcarro, terreo hostil

Máis aló do que suceda e como se desenvolvan, os enfrontamentos ante Servigroup Peñíscola son, historicamente, sinónimo de pouco premio a nivel de puntos. De feito, no feudo peñiscolano o balance noiés é de tres derrotas en tres partidos. Entre cella e cella está romper esa estatística e, de paso, deixar máis atrás a un conxunto dirixido por Santi Valladares ao que os noieses ven polo retrovisor na táboa, con 4 unidades de diferenza -12º con 20-. Nas filas do vixente campión da Copa de España FS militan varios internacionais españois, como o meta Gus, Juanqui, Sancho ou Diego Quintela, así como o chileno Araya, o paraguaio Gio e os arxentinos Plaza e a única incorporación invernal, o porteiro Lukas Acosta. Por outro lado, abandonaron a disciplina castellonense neste mesmo período Lucas Rocha e Cristian.

Declaracións previas

https://www.youtube.com/watch?v=V12Qys0pHDM

https://www.youtube.com/watch?v=MrgQtweapl4

O desprazamento

A expedición noiesa iniciou a súa viaxe en autobús o xoves pola noite, con chegada prevista na mañá do venres, cando realizaron no Pavillón de Castalia (Castellón) o último adestramento previo ao partido.

Emisión en directo

O duelo contará coa emisión en directo e en exclusiva a través de LALIGA+ (baixo subscripción), por web e app, este sábado 14 a partir das 18:00h.

Árbitros

Carlos Rodrigo Miguel e Fermín Ángel Sánchez-Molina Tapiador, do comité castelán-manchego. Balance con ambos de dous triunfos e tres derrotas.