PREVIA X18 (aprazado) PRIMEIRA DIVISIÓN FS | Servigroup Peñíscola FS - Noia Portus Apostoli FS | A por un importante triunfo e un bálsamo

1 hour ago
3 min read

Luns, 02/03/2026 · 19:55h · Imaxe: Foto Pichero | Os brancos recuperan o partido aprazado da xornada 18 (mar. 03/03, 20:30h. TV: LALIGA+) en Peñíscola. — **Luns, 02/03/2026 · 19:55h · Imaxe: Foto Pichero | Os brancos recuperan o partido aprazado da xornada 18 (mar. 03/03, 20:30h. TV:** **LALIGA+) en Peñíscola.**

O Noia Portus Apostoli FS visita este martes 3 ás 20:30h ao Servigroup Peñíscola FS, no que será a recuperación do partido da xornada 18 de Primeira División FS, aprazado o pasado 14 de febreiro pola alerta de vento na Comunitat Valenciana.

Os noieses aínda non coñecen a vitoria despois do regreso do parón de selecciones. Iso si, tivérona preto nos tres compromisos disputados. Escapóuselle nos penaltis na Copa do Rei FS ante Viña Albali Valdepeñas e, a continuación, na Liga coas remontadas sufridas na casa contra ElPozo Murcia Costa Cálida FS e Industrias Santa Coloma. Esta última, a do pasado venres, deixando un mal sabor de boca que o equipo de David Palmas quere quitar canto antes.

**Traballo o domingo e o luns de cara a este encontro | Imaxe: Manuel Lorenzo/Noia PA FS**

De novo, todos os xogadores, a excepción do lesionado de larga duración Leozin, están a disposición do técnico do Portus Apostoli, que terá que descartar a un para completar a lista de catorce que buscarán en terras peñiscolás tres puntos para recuperar as boas sensacións e achegarse aos desexados 30 puntos da permanencia virtual.

O Juan Vizcarro, terreo hostil

Para iso, haberá que romper as estatísticas. Máis aló do que sucedera e como se desenvolveran, o conxunto noiés nunca gañou fronte ao Servigroup Peñíscola FS, e moito menos no Juan Vizcarro, onde encaixou tres derrotas en tres visitas. Desfacer ese dato tamén suporía afastar na táboa ao equipo de Santi Valladares, situado 13º con 22 puntos, a 2 dos brancos, e que vén de empatar na casa (2-2) contra Osasuna Magna. Nas filas do vixente campión da Copa de España FS militan varios internacionais españois, os casos do meta Gus, Juanqui, Sancho ou Diego Quintela, así como o chileno Araya, o paraguaio Gio e os arxentinos Plaza e a única incorporación invernal, o porteiro Lukas Acosta. Por outro lado, abandonaron a disciplina castellonense neste mismo período Lucas Rocha e Cristian.

Declaracións previas

https://www.youtube.com/watch?v=K3bpmjnjKpM

O desprazamento

Este luns pola noite, viaxe en avión para a expedición noiesa, que aterrará en Valencia preto da madrugada.

Emisión en directo

O duelo contará coa emisión en directo e en exclusiva a través de LALIGA+ (baixo subscripción), por web e app, este martes 3 a partir das 20:30h.

Árbitros

Carlos Rodrigo Miguel e Fermín Ángel Sánchez-Molina Tapiador, do comité castelán-manchego. Balance con ambos de dous triunfos e tres derrotas.