Poñemos números ao “mellor momento da temporada”

Sábado, 22/03/2025 · 13:50h · Imaxe: Foto Pichero | Debullamos cinco datos que reflicten o gran estado de forma actual do Portus Apostoli.

O Noia Portus Apostoli FS está actualmente no seu mellor momento da temporada. E non só o din os protagonistas, senon que tamén os números, eses que non paraban de dar a costa nos primeiros meses de curso, pero que agora, por fin, lles sorrín. Destacamos a continuación cinco dos datos que delatan o cambio de dinámica noiés.

·Cuartos na clasificación da segunda volta

Mesmos puntos que o campión de Europa nesta segunda volta. (Imaxe: Foto Pichero)

Ata a xornada 15, última da primeira volta, tivo que agardar o Portus Apostoli para lograr o primeiro triunfo ligueiro do curso. Tras ese partido en Zaragoza, os brancos eran pechacancelas con 7 puntos. Esa vitoria supuxo o clic definitivo. E é que, se só tomamos en conta as sete xornadas que levamos de segunda metade do campionato para a clasificación, los noieses son o cuarto mellor equipo, con 12 puntos de 21 posibles grazas a tres vitorias, tres empates e unha derrota. Por diante están unicamente Peñíscola (19), Barça (16) e, coa mesma puntuación, Illes Balears Palma Futsal, mentres que polo retrovisor ven a grandes conxuntos como Movistar Inter FS (11) ou ElPozo Murcia Costa Cálida FS (10), que será o seu próximo rival.

·Só unha derrota nos últimos 10 partidos de Liga

A única cruz en meses, ante Servigroup Peñíscola. (Imaxe: Foto Pichero)

Como se mencionaba no anterior parágrafo, tan só un partido perderon os noieses no que vai de segunda volta. Pero, se botamos a vista un pouco máis atrás e collemos os tres duelos finais da primeira, ante CD Burela FS (2-2), Illes Balears Palma Futsal (3-3) e Wanapix Sala 10 (1-3), os resultados dictan que a derrota da xornada 19 ante o líder Servigroup Peñíscola FS é a única nos últimos 10 partidos. Sumar, aínda que sexa con empates, tamén vale de moito nunha competición moi igualada.

·Sólidos nas visitas

O triunfo en Zaragoza, o primeiro lonxe de Noia. (Imaxe: Alexio Raw/Wanapix Sala 10)

As primeiras cinco saídas da temporada saldáronse con sendas derrotas. Ata o punto logrado en Burela, o 4 de xaneiro, os noieses non sumaran como visitantes. Desde entón, son dúas vitorias (claves ademais, en Zaragoza e Tudela) e outros dous empates (en Córdoba e Cartaxena), xunto ao conseguido en A Mariña lucense, os que provocan que o equipo de David Palmas non coñeza a derrota lonxe de casa desde hai máis de tres meses, o 21 de decembro en Santa Coloma. Durante varias xornadas e ata que chegaron eses triunfos na casa contra Osasuna Magna e Burela, o Noia presentou mellor puntuación fóra que no Mourís, froito desta gran xeira que tratarán de prolongar no Municipal dos Deportes de Murcia este venres 28.

·A mellora goleadora

Pirata (11) e Power (8), os máximos goleadores do equipo. (Imaxe: Foto Pichero)

O máis importante do fútbol sala e outros tantos deportes, e o que tanto tempo semellaba unha maldición sobre o Portus Apostoli: o gol. 207 minutos, algo máis de 5 partidos, estiveron os brancos sen marcar en Liga entre as xornadas 4 e 9. Entre medias, grandes actuacións dos metas rivais, innumerables disparos ao pau e outras ocasións marradas que marcaron boa parte dunha desgrazada primeira volta que os noieses terminaron con 21 goles a favor tras 15 jornadas. Nestas 7 de segunda volta, xa son 18 os tantos convertidos. Un contraste notorio no que toma protagonismo o nome de Pirata, máximo goleador do equipo, que logrou 8 das súas 11 dianas a partir da 16ª data.

·Peixe e Schütt: os que menos encaixan na segunda volta

A parella brasileira mantén a resistencia en defensa. (Imaxe: Manuel Lorenzo/Noia PA FS)

E, por último, pero quizais unha das cousas máis relevantes, a seguridade atrás. Soa raro dicilo do antepenúltimo da clasificación cun punto sobre o descenso, pero incluso nos malos momentos, a portería noiesa non era das máis castigadas, e neste tramo positivo os números son aínda mellores. Con 13 goles recibidos nos últimos 7 partidos, a parella composta por Peixe e Schütt é a que menos encaixa nesta segunda volta ligueira, seguida polos 15 de Servigroup Peñíscola FS, e con ampla diferenza sobre rivais directos como Córdoba Patrimonio de la Humanidad (24), Viña Albali Valdepeñas (26) ou Wanapix Sala 10 (34). E se miramos a nivel global na táboa, cos 57 tantos recibidos en total a do Noia é a quinta portería menos batida do campionato, igualada coa de Osasuna Magna. Un ferrollo que, ao igual que o resto de estatísticas, será clave que permaneza en boa liña para perseguir e lograr o obxectivo da permanencia.