Coñecemos o resto do calendario da primeira volta | Horarios das xornadas 9, 10, 11, 12, 13, 14 e 15
- Departamento prensa Noia PA FS
- Sep 30
- 2 min read
A RFEF deu a coñecer os horarios para as xornadas 9, 10, 11, 12, 13, 14 e 15 do campionato ligueiro.
A primeira delas, a 9, acontecerá antes do previsto. Debido á disputa da Copa Intercontinental por parte do Illes Balears Palma Futsal, o duelo contra os baleares en Son Moix xogarase o luns 20 de outubro ás 19:30h.
Tras xogar a 7ª e a 8ª xornada e un parón dunha semana, chegará a 10ª na casa ante o Movistar Inter FS. O regreso ao Mourís de Pirata sucederase o sábado 15 de novembro ás 17:00h. Sete días despois á mesma hora, os de David Palmas visitarán ao Industrias Santa Coloma na xornada 11.
O camiño continuará recibindo ao Córdoba Patrimonio de la Humanidad o sábado 29 de novembro ás 20:00h pola 12ª data. Será a primeira de dúas seguidas como local, xa que o sábado 6 de decembro ás 17:00h os brancos enfrontaranse ao Barça no Agustín Mourís.
Os dous últimos partidos da primeira volta terán como rivais aos ascendidos. O sábado 13 de decembro ás 18:00h o Portus Apostoli xogará na pista do Family Cash Alzira FS, mentres que o sábado 27 ás 18:30h haberá derbi galego por Nadal no feudo noiés contra O Parrulo Ferrol FS.
Cando podo conseguir entradas para os partidos no Mourís?
Unha semana antes de cada partido na casa habilitarase a venda de entradas online en noiafs.compralaentrada.com/eventos. Tamén poderás facerte coa túa entrada no Local Social do Club (rúa Carcasía, 7. Noia) de luns a venres, excepto festivos, no horario especificado en redes sociais.
Comments