CRÓNICA X9 (adiantado) PRIMEIRA DIVISIÓN FS (IBP 11–6 NPA) | Excesivo castigo

Luns, 20/10/2025 · 23:55h · Imaxe: Manuel Lorenzo/Noia PA FS | Un mal tramo final e un Palma inspiradísimo empañaron o que fora unha gran actuación do Portus Apostoli en Son Moix, onde se puxo ata catro veces por diante.

Durante moitos minutos tívoo onde quería o Portus Apostoli en Son Moix. Por diante no marcador -ata en catro ocasións-, cómodo no interminable reparto de alternativas. Pero o tramo decisivo de partido foi fatal para as súas opcións. O Illes Balears Palma Futsal soubo aproveitar cada erro visitante a través dunha puntería extrema que colocou un marcador enganoso con respecto ao visto no parqué.

O descontrol goleador comezou cedo. Rivillos abriu a lata no minuto 6, aínda que antes xa puido marcar calquera escadra varias veces. Os brancos non se esconderon e déronlle a volta rápido. Macedo estreou a súa conta particular como noiés nunha transición conducida por David Pazos, quen posteriormente definiu de luxo coa zurda para o 1-2 no minuto 10, tras unha deixada de Leozin.

Estrea goleadora do luso | Imaxe: Manuel Lorenzo/Noia PA FS

Estaba ben plantado o Noia, aínda que as cinco faltas no seu haber obrigáronlle a entregar algúns metros. Aproveitouno Lucão para crear perigo por banda, e un tiro do brasileiro desviado por Varsalona convertiuse no empate a dous. Sen apenas tempo para asimilalo, Rivillos cometeu penalti e David Pazos transformouno con seguridade. A tres minutos de encarar vestiarios, Fabinho volveu a igualar cun preciso dereitazo.

Un final para esquecer

O ‘tira e afrouxa’ entre noieses e palmesanos continuou na segunda metade. A vermella directa a Luan Muller por unha man fóra da área deixou aos brancos cun máis, algo do que se beneficiou o Noia por medio de Biel para volver a poñerse en vantaxe.

A fervenza de momentos destacados seguiu sendo constante en ambos lados. Lucão nivelou novamente para Illes Balears Palma Futsal a porta baleira, nun fallo na saída de presión galega. Rubi estivo a punto de devolver a predominancia aos seus, pero foi outro erro, esta vez do meta local Dennis, o que propiciu o 4-5 de Macedo. Nada máis reiniciarse o xogo, Machado empatou a contenda para os baleares por cuarta vez.

E sería a definitiva. A partir de aí, o tricampión de Europa e bicampión do Mundo fixo sangue e botín, sobre todo das entregas noiesas. Así logrou Ernesto o seu dobrete para o 7-5. Respondeu David Palmas colocando a Biel coa camiseta de porteiro-xogador a seis minutos do final e Ismael tivo a máis clara, que se perdeu por pouco.

Quen xa non perdoaba era o Illes Balears Palma Futsal, letal en practicamente todas as súas ocasións. Deivão, Lin, Machado e Mateus Maia -este último en superioridade numérica tras a vermella directa a Douglas- debuxaron uns 11 tantos palmesanos excesivamente duros. A sete segundos do final, Ismael pechou o resultado cun golazo, o 6º dun Noia ao que nun abrir e pechar de ollos se lle caeu todo o castillo que construira.

Ismael anotou o último tanto | Imaxe: Manuel Lorenzo/Noia PA FS

Próximo partido

Vistas postas xa no sábado 25 ás 18:00h, cando os noieses visitarán ao ATP Iluminación Ribera Navarra FS pola sétima xornada ligueira.

---

Ficha técnica

Illes Balears Palma Futsal: Luan Muller (p), Machado, Ernesto, Mateus Maia e Fabinho. Tamén xogaron Carlos Barrón (p) (c), Dennis, Rivillos, Deivão, Lin, Lucão, Charuto, Alisson e David Peña.

Noia Portus Apostoli FS: Peixe (p), Churrasco, Rubi, David Pazos (c) e Biel. Tamén xogaron Montero, Altamirano, Varsalona, Leozin, Macedo, Douglas, Thierry e Ismael.

Goles: 1-0 Rivillos (6’), 1-1 Macedo (9’), 1-2 David Pazos (11’), 2-2 Varsalona, en propia meta (12’), 2-3 David Pazos, de penalti (13’), 3-3 Fabinho (17’), 3-4 Biel (25’), 4-4 Lucão (27’), 4-5 Macedo (31’), 5-5 Machado (31’), 6-5 Ernesto (33’), 7-5 Ernesto (34’), 8-5 Deivão (38’), 9-5 Lin (38’), 10-5 Machado (39’), 11-5 Mateus Maia (40’), 11-6 Ismael (40’).

Os árbitros Diego Corredor Corredor (comité andaluz) e Ricardo García-Carpintero López (comité castelán-manchego) amoestaron con tarxeta amarela nos baleares a Rivillos (13’), o adestrador Vadillo (15’) e Machado (28’). Viu a vermella directa Luan Muller (24’). Nos noieses, amarelas a Peixe (2’) e Macedo (22’). Viu a vermella directa Douglas (38’).

Incidencias: partido correspondente á xornada 9 adiantada da Primeira División FS, disputado no Palau Municipal d’Esports Son Moix de Palma ante uns 2.500 espectadores.