CRÓNICA X5 PRIMEIRA DIVISIÓN FS (OSA 1–2 NPA) | Asalto a Anaitasuna

Venres, 03/10/2025 · 23:55h · Imaxe: Manuel Lorenzo/Noia PA FS | Un golazo de Altamirano a 1 minuto e medio do final outorga a segunda vitoria seguida a un Portus Apostoli que confirma a súa boa dinámica.

Tres puntos de ouro para o Noia Portus Apostoli FS en Pamplona. Os de David Palmas conquistaron Anaitasuna cun golazo de Altamirano no tramo final, que deu o merecido premio a unha gran actuación dos noieses e a segunda vitoria consecutiva, ademais dos primeiros puntos lonxe da casa.

As hostilidades do partido rompéronse cedo. Corría o minuto 3 cando Dani Saldise colocaba o 1-0, a servizo dun Pachu co que combinou tras facerse cun balón solto preto da área branca.

O Portus Apostoli non empezou ben, pero recompúxose rápido. Coas incorporacións de Peixe, a pista volcouse cara a portería defendida por Asier. No 7’, o meta local detivo a primeira, pero non a segunda intentona de Leozin, que coa súa estrea goleadora oficial poñía o empate e facía xustiza ao bo momento branco.

Macedo sacou a súa maxia e Leozin definiu | Imaxe: Manuel Lorenzo/Noia PA FS

Do caos á tolemia... noiesa

O empuxe local co que terminou a primeira metade disipouse tras o paso por vestiarios. Churrasco estivo a punto de adiantar aos noieses a pase de Peixe, cuxas incorporacións seguiron sendo un arma moi perigosa ante o rival. Osasuna Magna achegouse menos a dominios visitantes, pero contou cunha clarísima nos pés de Linhares, que non acertou a porta baleira.

Nesas, e xusto superado o ecuador do segundo acto, o partido entrou nun terreo caótico protagonizado polas expulsións. O primeiro en abandonar o choque antes de tempo foi Gustavo Marra, previa revisión no Soporte de Vídeo. Fregábase as mans o Noia coa superioridade numérica, pero, sen apenas máis marxe que para xerar unha ocasión reseñable, Ismael vía a segunda amarela e deixaba aos seus tamén cun menos. Moito enredo -que puido ser máis de irse expulsado Cerviño noutra acción revisada no SV-, aínda que sen repercusión nun marcador que mantiña o 1-1.

Ata que Altamirano sacou, por momento e calidade, un aspirante a gol da xornada. Como se as espadas non estiveran por todo o alto, como se Anaitasuna fora o patio da súa casa e non un feudo practicamente inexpugnable, o arxentino retou ao seu par, quebrou por fóra na súa arremetida pola banda e executou un latigazo coa esquerda -a súa perna menos boa- para axustizar a Asier. O 1’21’’ que tivo para manobrar Osasuna Magna con Korsun de porteiro-xogador fíxose eterno, pero conduciu á felicidade dun Portus Apostoli que puido festexar xunto á vintena de afeccionados desprazados desde a Vila un valiosísimo segundo triunfo seguido que coloca 7 puntos no casilleiro branco.

Próximo partido

O cadro de David Palmas recibirá ao Jimbee Cartagena Costa Cálida pola 6ª xornada ligueira o vindeiro sábado 11 ás 17:00h no Agustín Mourís.

---

Ficha técnica

Osasuna Magna: Asier (p) (c), Cuello, Ion Cerviño, Pachu e Dani Saldise. Tamén xogaron Linhares, Korsun, Ortàs, Gustavo Marra e Josu Mendive.

Noia Portus Apostoli FS: Peixe (p), Churrasco, Diego Fávero, Rubi e Biel. Tamén xogaron Montero, Altamirano, Varsalona, Leozin, Macedo, David Pazos (c), Thierry e Ismael.

Goles: 1-0 Dani Saldise (3’), 1-1 Leozin (7’), 1-2 Altamirano (39’).

Os árbitros Andrés Botella López e Francisco Castillo López, do comité murciano, amoestaron con tarxeta amarela nos navarros a Asier (26’) e Ion Cerviño (38’). Viu a vermella directa Gustavo Marra (31’). Nos noieses, amarelas a Macedo (19’), Ismael (30’ e 32’) e o adestrador David Palmas (38’).

Incidencias: partido correspondente á xornada 5 da Primeira División FS, disputado no Pavillón Anaitasuna de Pamplona ante uns 1.000 espectadores.