CRÓNICA X1 PRIMEIRA DIVISIÓN FS (QHM 4–3 NPA) | Sen premio no reparto de golpes

Sábado, 06/09/2025 · 19:57h · Imaxe: Manuel Lorenzo/Noia PA FS | Os brancos quedaron coas ganas de sumar nunha estrea ligueira chea de alternativas.

Manzanares seguirá sendo lugar adverso para o Portus Apostoli, polo menos, un ano máis. O equipo de David Palmas comezou de luxo, cun gol aos nove segundos de partido, pero pagaron demasiado caros os seus erros nun duelo de alternancias que serviu de estrea ligueira para ambos conxuntos.

O madrugador tanto de Ismael, froito dunha excelente xogada ensaiada desde o punto central da cancha, non sentou demasiado ben aos seus, de manera paradóxica. O Quesos El Hidalgo Manzanares FS apretou, xunto a unha entregada afección, e logrou darlle a volta ao marcador. Primeiro empatou Daniel convertendo un penalti ratificado polos colexiados no Soporte de Vídeo, gran novidade deste curso; e, superado o ecuador do primeiro tempo, Álvaro tirou de espora para o 2-1.

Debut de luxo de Ismael | Imaxe: Manuel Lorenzo/Noia PA FS

A partir de aí, o envite equilibrouse e o Noia soubo atopar o camiño do empate antes do receso. Anotouno Varsalona, outro que facía o seu debut oficial cunha camiseta noiesa branca que tamén estaba de estrea. O arxentino enviou á rede un balón servido por Thierry no área ao 16’ de xogo.

Rozando os puntos

Cunha manobra practicamente calcada á que supuxo a súa primeira diana, Álvaro otorgou de novo a vantaxe aos manzanareños, xa transcorridos seis minutos do segundo tempo.

De novo por detrás, o Noia lanzouse ao ataque combinando incorporacións de Schütt e Peixe con ataques de catro. Macedo, Biel e Thierry dispuxeron de perigosas chegadas antes de que Douglas se zafara de dous rivais e, cun disparo axustado ao pau, volvera a nivelar o electrónico no 31’. Pouco durou a alegría no bando visitante, xa que Juan Emilio embocou ás mallas un pase ao segundo pau de Eloy de Pablos practicamente na acción posterior.

Moitas ocasións quedaron preto de materializarse | Imaxe: Manuel Lorenzo/Noia PA FS

A pola reacción foi o equipo noiés, animado ademais por unha trintena de afeccionados presentes detrás da portería de Antonio Navarro. Todos eles gritaron o “ui” co tiro ao pau de Macedo, lamentaron as paradas do meta local e viron aos seus buscar o empate ata o final con Leozin como porteiro-xogador, pero a puntería e a fortuna foron esquivas.

Próximo partido

Sen tiempo para pensalo máis, os brancos recibirán ao Jaén Paraíso Interior FS este martes 9 ás 20:00h, pola xornada 2 de Primeira División FS. Consegue as túas entradas en noiafs.compralaentrada.com/eventos.

---

Ficha técnica

Quesos El Hidalgo Manzanares FS: Antonio Navarro (p), Toni Escribano, Eloy de Pablos, Álvaro e Daniel (c). Tamén xogaron Javi Alonso, Deivão, Khalid, Humberto, Raúl Campos e Juan Emilio.

Noia Portus Apostoli FS: Schütt (p), Varsalona, Thierry, Altamirano (c) e Ismael. Tamén xogaron Peixe (p), Montero, Leozin, Macedo, Diego, Biel, Douglas, Churrasco e Rubi.

Goles: 0-1 Ismael (1’), 1-1 Daniel, de penalti (9’), 2-1 Álvaro (11’), 2-2 Varsalona (16’), 3-2 Álvaro (26’), 3-3 Douglas (31’), 4-3 Juan Emilio (31’).

Os árbitros Juan José Cordero Gallardo (comité andaluz) e Sergio Salomé Vizuete (comité estremeño) amoestaron con tarxeta amarela nos manzanareños a Deivão (13’), Toni Escribano (32’) e Juan Emilio (40’). Nos noieses, amarelas a Leozin (9’) e Diego Fávero (32’).

Incidencias: partido correspondente á xornada 1 da Primeira División FS, disputado no Manzanares Arena ante uns 1.700 espectadores.