Álex García renova ata 2026 e xogará cedido esta temporada en Burela

O á catalán amplía a súa vinculación co club noiés ata xuño de 2026 e continuará coa súa progresión a préstamo no equipo de A Mariña na 23/24.

(foto: Pichero)

O xogador Álex García e o Noia Portus Apostoli FS alargan a súa relación, que vencía en xuño de 2024, por dúas temporadas máis, ata o ano 2026. Á súa vez, esta temporada 2023/2024 xogará como cedido no Pescados Rubén Burela FS, da Segunda División.

O á catalán de 21 anos aterrou en Noia en xaneiro, a metade da pasada campaña, procedente do UD Ibiza Gasifred Ciutat d’Eivissa FS, consagrado como un dos mozos do fútbol sala español con maior proxección, despois de gañar o Europeo Sub-19 coa Selección Española en 2022. Coa camiseta branca disputou 10 partidos oficiais entre todas as competicións, sumando 2 goles.

Moita sorte nesta nova aventura, Álex!